Galata Mahkemesi 32 Numaralı Sicil (H. 1015 - 1016 / M. 1606 - 1607) cilt: 36, sayfa: 198 Hüküm no: 251 Orijinal metin no: [61b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Canfedâ Hâtun bt. Abdullah’ın mehir alacağını hibe ettiği Mahmiye-i Galata’da beytülmâl emîni olan fahrü’l-emâsil Mahmud Çavuş b. Ahmed mahfil-i kazâda işbu hâmilü’l-kitâb Mahmud Reis b. Mehmed muvâcehesinde takrîr-i da‘vâ edip bundan akdem mahmiye-i mezbûrede vâki‘ Mustafa Ağa mahallesinde fevt olan Canfedâ Hâtun bt. Abdullah’ın mezbûr Mehmed Reis zevc-i metrûkü ve vârisi olup verâseti mezbûr Mahmud ile beytülmâle münhasıra olmağla müteveffât-ı mezbûrenin mezbûr zimmetinde mehr-i müeccelinden iki bin akçe hakkı olup beytülmâle âid olan hisseyi mezbûr Mehmed Reis’den taleb ederim [62a] suâl olunsun dedikde gıbbe’s-suâl mezbûr Mahmud Reis cevâb verip fi’l-hakīka müteveffât-ı mezbûrenin zimmetinde iki bin akçe mehr-i müecceli var idi lâkin hâl-i hayâtında ve kemâl-i sıhhatinde bana hibe eyledi kat‘â deynim yoktur diye cevâb verdikde gıbbe’l-inkâr merkūm Mahmud Reis’in kelâmına muvâfık beyyine taleb olundukda udûl-i müslimînden ve sikāt-ı muvahhidînden Hasan Çelebi b. Mehmed ve Abdi Ağa b. Sefer nâm kimesneler li ecli’ş-şehâde hâzırân olup fi’l-vâki‘ müteveffât-ı mezbûre hâl-i hayâtında ve kemâl-i sıhhatinde dahi mezbûr Mahmud Reis’de olan iki bin akçe mehr-i müeccelini bizim yanımızda mezbûr Mahmud Reis’e hibe etti bu husûsa şâhidleriz şehâdet dahi ederiz dediklerinde gıbbe’t-ta‘dîl ve’t-tezkiyye şehâdetleri hayyiz-i kabûlde vâki‘ olup mâ vaka‘a ketb olunup yed-i tâlibe def‘ olundu. Tahrîren fî evâsıtı şehri Recebi’l-mürecceb sene sitte aşere ve elf. Şuhûdü’l-hâl: Mehmed Bey b. Abdi, Mustafa Halîfe b. Abdülaziz, Ahmed Çavuş b. Hüsam, İskender Bey b. Mehmed, Ahmed Halîfe b. Şaban