Galata Mahkemesi 32 Numaralı Sicil (H. 1015 - 1016 / M. 1606 - 1607) cilt: 36, sayfa: 209 Hüküm no: 268 Orijinal metin no: [65a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vasînin, vesâyeti altındaki küçüğün mîrâs payını teslim aldığına dair Mahmiye-i Galata’da beytülmâl emîni olan fahrü’l-emâsil Ali Bey b. Mustafa mahfil-i kazâda mahmiye-i mezbûrede vâki‘ Müeyyedzâde mahallesi sâkinlerinden müteveffâ Ahmed Reis b. Yakub’un eytâmına vasiyy-i muhtâr olan el-Hâc İbrahim b. Yakub el-mezbûr muvâcehesinde ikrâr ve i‘tirâf edip müteveffâ-yı mezbûrun muhallefâtı ba‘de’l-ihrâcât altı yüz bin akçe olup meblağ-ı mezbûr beyne’l-verese taksîm olundukda müteveffâ-yı mezbûr Ahmed Reis’in veresesinden sulbiye kızı Emine ve hâtunu Râbia nâm gāibe hisse-i şer‘iyye-i ma‘lûmeleri yüz altmış sekiz bin beş yüz altmış akçenin aslından yüz on dokuz bin üç yüz fıddî râyic fi’l-vakt Osmânî akçe mîrî için bana vâsıl olup emânetim hasebiyle ahz u kabz eyledim diye ikrâr ve i‘tirâf ettikde mukırr-ı mezbûrun ikrârını mukarrun lehü’l-mezbûr el-Hâc İbrahim bi’l-muvâcehe tasdîk ettikde gıbbe’t-taleb mâ vaka‘a kayd olundu. Tahrîren fî evâili Cumâdelâhire sene sitte aşere ve elf. Şuhûdü’l-hâl: Sinan Reis b. Mustafa, Hüdâverdi Reis b. Abdullah, Ahmed Reis b. Abdüllatif, Hacı Reis b. Mehmed, el-Hâc İsa b. Sevindik ve gayruhüm