Galata Mahkemesi 32 Numaralı Sicil (H. 1015 - 1016 / M. 1606 - 1607) cilt: 36, sayfa: 212 Hüküm no: 275 Orijinal metin no: [66a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdülbaki b. Receb’in borcu olmadığına dair yemîn ettiği Havâss-ı Kostantıniyye mahallâtından Kasımpaşa mahallesi sükkânından olup bundan esbak vefât eden merhûm Mehmed Bey b. Davud’un vâlidesi Aynî Hâtun bt. Mustafa meclis-i şer‘de mahalle-i mezbûreden Abdülbâkī b. Receb mahzarında takrîr-i kelâm edip oğlum mezbûr Mehmed Bey merkūm Abdülbâkī ile müşterek kasablık ederler idi müteveffâ-yı mezbûrun merkūm Abdülbâkī yedinde sekiz bin akçe sermâyeden ve sekiz yüz akçe fâideden hakkı olup meblağ-ı merkūmdan bir def‘a dört bin akçe müteveffâ-yı mezbûrun techîz ve tekfîni için ve dört bin sekiz yüz akçe edâ-i deyni için cem‘an sekiz bin sekiz yüz akçe makbûzum olup zikr olunandan mâ‘adâ zimmetinde bir şey olmadığına tahlîfin taleb ederim deyip gıbbe’l-istihlâf matlûbu üzre yemîn-i billâhi’l-aliyyi’l-azîm edicek mâ vaka‘a gıbbe’t-taleb kayd ü sicil olundu. Cerâ fî târihi’l-mezbûr. Şuhûdü’l-hâl: Hüsrev Efendi b. Ahmed, Mehmed Çelebi b. Hasan, Hüseyin Çelebi b. Abdurrahman, Mehmed b. Yusuf, Mustafa b. Mehmed ve gayruhüm mine’l-hâzırîn