Galata Mahkemesi 32 Numaralı Sicil (H. 1015 - 1016 / M. 1606 - 1607) cilt: 36, sayfa: 213 Hüküm no: 276 Orijinal metin no: [66b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Miras hisselerine ilişkin tarafların yekdiğerinin zimmetini ibrâ etmesi Derkenâr “Bu hüccet kaydında galat olup ikinci kâğıtta sahîhi mukayyeddir bununla amel olunmaz” Budur ki, mahmiye-i Galata mahallâtından Câmi‘-i kebîr mahallesinden olup bundan esbak vefât eden merhûme Rukiye Hâtun nâm müteveffânın zevc-i metrûkü ve vârisi Mustafa Çelebi b. Mehmed mahfil-i şer‘-i hatîru lâzimü’t-tevkīrde müteveffât-ı merkūmenin vâlidi olup vâlidesi Envar Hâtun bt. Abdullah tarafından vekîl olup tarîk-i şer‘î üzre vekâleti sâbite olan fahrü’l-eimme Şeyh Mehmed Efendi b. Şeyh Ahmed mahzarında takrîr-i kelâm ve ta‘bîr-i ani’l-merâm edip müteveffât-ı mezbûrenin verâseti bana ve sadriyye kızı Sâliha nâm sagīreye ve vâlidi mezbûr Şeyh Mehmed Efendi’ye ve vâlidesi merkūme Envar Hâtun’a münhasır olup müteveffât-ı mezbûrenin zimmetimde mehr-i müeccelinden otuz bin ve beynimizde cinsi ve nev‘i ma‘lûm esbâbı bahâsından kırk dört bin beş yüz on sekiz olup ve müteveffât-ı mezbûrenin esbâbı bahâsından altmış bin dokuz yüz on altı akçe mezbûr Şeyh Mehmed Efendi ve müvekkilesi merkūme Envar Hâtun yedlerinden alıp cem‘an yüz elli beş bin dört yüz otuz dört akçe metrûkâtı olup meblağ-ı merkūmdan müteveffât-ı mezbûrenin sülüs-i vasiyyet-i şer‘îsi için elli bir bin sekiz yüz on bir akçe ihrâc olunup bâkī yüz üç bin altı yüz yirmi üç akçe beynimizde taksîm olunmadan sulbiye kızımız merkūme Sâliha dahi vefât edip onun verâseti bana ve cedde-i sahîhası mezbûre Envar Hâtun’a münhasır oldukda meblağ-ı merkūm yüz üç bin altı yüz yirmi üç akçeden yirmi üç bin dokuz yüz on iki akçe benim rub‘u hisse-i şer‘iyyem on beş bin dokuz yüz kırk iki akçe südüs mezbûr Mehmed Efendi’nin hisse-i şer‘iyyesi olup ve on beş bin dokuz yüz kırk iki akçe mezbûre Envar Hâtun’un südüs hisse-i şer‘iyyesi olup ve kırk yedi bin sekiz yüz yirmi altı akçe sulbiyem sagīre-i mezbûrenin hisse-i şer‘iyyesi olup benim rub‘u hisse-i şer‘iyyem ve kızım sagīre-i mezbûrenin nısf hissesi cem‘an yetmiş bir bin yedi yüz kırk akçe olup zimmetimden mezbûr Şeyh Mehmed Efendi’ye edâsı lâzım iki bin yedi yüz yetmiş sekiz akçe kalmış iken sulbiye kızım mezbûre Sâliha vefât etmekle onun nısf hisse-i şer‘iyyesi meblağ-ı merkūmdan yedi bin dokuz yüz yetmiş bir akçe cedde-i sahîhası mezbûre Envar Hâtun’a südüs hisse-i şer‘iyye lâzım geldikde cem‘an üç bin yedi yüz kırk dokuz akçeyi mezbûr Şeyh Mehmed Efendi’ye teslîm ettim ol dahi asâleten ve vekâleten kabz ve tesellüm etti her birimizin alâ mâ faraza’llahü ta‘âlâ hisse-i şer‘iyyemiz bi’t-tamâm vâsıl olup min ba‘d muhallefât-ı mezbûreye müte‘allik biri birimizden da‘vâ ve talebimiz yoktur dedikde mukırr-ı merkūm Mustafa Çelebi’nin ikrâr-ı meşrûhunu mezbûr Şeyh Mehmed Efendi asâleten ve vekâleten bi’l-muvâcehe tasdîk edicek mâ vaka‘a kayd olundu. Tahrîren fî evâili şehri Şa‘bâni’l-mu‘azzam sene sitte aşere ve elf. Şuhûdü’l-hâl: eş-Şeyh İsa b. Ahmed, eş-Şeyh Sâlih b. Abdurrahman, Hacı Ahmed b. Yusuf, el-Hâc Abdullah b. Mehmed, Şaban Bey b. Yusuf, Osman Bey b. Abdullah, Hacı Hüseyin b. Abdullah, Sefer b. Abdullah