Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 36 Hüküm no: 3 Orijinal metin no: [2a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Reis’in çocukları Fâtıma, Âişe ve Muhsine’nin gemi hisselerinin vasîleri tarafından Dede Reis b. Mustafa’ya satılması Vilâyet-i Anadolu’da Kal‘a-i Sultâniye sükkânından olup bundan esbak vefât eden merhûm Hasan Reis b. Balaban nâm müteveffânın evlâd-ı sıgārından Fâtıma ve Âişe ve Muhsine nâm sagīrelerin kıbel-i şer‘den mansûb vasîsi olan Ali Reis b. Mustafa mahfil-i şer‘-i hatîr-i lâzımü’t-tevkīrde, işbu hâfız hâze’l-kitâb fahrü’l-akrân Dede Reis b. Mustafa muvâcehesinde vesâyeten ikrâr-ı tâmm ve ta‘bîr ani’l-merâm edip, müteveffâ-yı merkūm Hasan Reis’in verâseti vasîsi olduğum mezbûre Fâtıma ve Âişe ve Muhsine ve sulbî oğulları Mehmed ve Hüseyin’e ve zevcesi Kaya bt. İskender nâm hâtuna münhasıra oldukda, muhallefâtından Karamürsel demekle ma‘rûf yirmi altı zirâ‘ sefînesinin sekiz sehimde birer sehim mezbûre Fâtıma ve Âişe ve Muhsine’nin ve dört sehmi mezbûreyn Mehmed ve Hüseyin’in ve bir sehmi mezbûre Kaya Hâtun’un hisse-i şer‘iyyeleri oldukda, sefîne-i mezbûre iki aydan mütecâviz beyne’t-tâlibîn müzâyede olunup rağabât-ı nâs münkatı‘a olup, kırk beş bin Osmânî akçede mezbûr Dede Reis üzerinde karâr ettikde, sefîne-i mezbûreyi beynimizde ma‘lûm dört aded topu ve âlât-ı lâzımesinin sekiz sehimde üç sehmini on altı bin sekiz yüz yetmiş beş akçeye vesâyetim hasebiyle mezbûr Dede Reis’e bey‘-i kat‘î ile bey‘ ve teslîm edip, ol dahi iştirâ ve tesellüm ettikden sonra meblağ-ı merkūm on altı bin sekiz yüz yetmiş beş akçe vesâyeten mezbûr Dede Reis yedinden bi’t-tamâm ahz ve kabz ettim dedikde, vasiyy-i mezbûr Ali Reis’in ikrâr-ı meşrûhunu [2b] mezbûr Dede Reis bi’l-muvâcehe tasdîk ve tahkīk edicek, mâ-vaka‘a alâ vukū‘ihî kayd olundu. Tahrîren fî evâsıtı Zilka‘deti’ş-şerîfe li sene isneyn ve ışrîn ve elf. Şuhûdü’l-hâl: Mustafa Çavuş b. Abdurrahman, Ferhad Reis b. Hüseyin, Mustafa Reis b. el-Hâc Mehmed, Ramazan [b.] Himmet.