Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 35 Hüküm no: 2 Orijinal metin no: [1b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yeniçeri Cafer Beşe b. Abdullah’ın İbrahim Ağa b. Abdülmennân’da alacağı olmaması Dergâh-ı âlî yeniçerilerinden Cafer Beşe b. Abdullah meclis-i şer‘-i hatîr-i lâzımü’t-tevkīrde, işbu hâfız-ı hâze’l-kitâb fahrü’l-akrân İbrahim Ağa b. Abdülmennân muvâcehesinde takrîr-i kelâm ve ta‘bîr ani’l-merâm edip, zevcem olup evân-ı rüşde dâhile olmadan vefât eden merhûme Hatice bt. Osman nâm sagīrenin mezbûr İbrahim Ağa vasiyy-i muhtârı olup, babası mezbûr Osman’dan irs-i şer‘le intikāl eden hissesine vâzı‘ü’l-yed iken mezbûr Hatice fevt olup, verâseti bana ve vâlidesi Üftâde Hâtun’a ve li ebeveyn kız karındaşı Âişe’ye ve li ümm karındaşı Mehmed’e münhasıra oldukda vasiyy-i mezbûr İbrahim Ağa yedinde mazbûta olan muhallefâtından beş yüz bin ve otuz bin yedi yüz seksen beş akçe beyne’l-verese kısmet olunup meblağ-ı merkūm beş yüz bin ve otuz bin seksen beş akçeden ziyâde mezbûr İbrahim Ağa yedinden otuz bin akçe bâkī kaldı taleb ederim suâl olunsun dedikde, gıbbe’s-suâl mezbûr İbrahim Ağa fi’l-vâki‘ sagīre-i mezbûre Hatice’nin vasiyy-i muhtârı olup, babasından intikāl eden hissesi yedimde mazbûta iken fevt oldukda hâl-i hayâtında levâzım-ı mühimmesine harc ve sarf ettiğim meblağ otuz bin akçe hesâb olunup, mezbûr Cafer Beşe dahi hüsn-i kabûl ile kabûl edip bâkī beş yüz otuz bin yedi yüz seksen beş akçe beyne’l-verese kısmet olunup, meblağ-ı merkūm otuz bin akçeye müte‘allik da‘vâ ve talebden zimmetimi ibrâ ve ıskāt ve yedime hüccet-i şer‘iyye vermişdir deyû cevâb verip, sene ihdâ ve ışrîn ve elf târihinde mahmiye-i Galata’da kassâm-ı askerî olan Mevlânâ Mehmed Efendi imzâsıyla mümzât ve hatmi ile mahtûme ve târih-i mezbûr ile müverraha maznûnu cevâbına muvâfık hüccet-i şer‘iyye ibrâz ettikde, mezbûr Cafer Bâşe merkūm İbrahim Ağa’nın sıdk-ı cevâbını ve sıhhat-i mazmûn-ı hüccet-i şer‘iyye münkir oldukda mezbûr İbrahim Ağa’dan sıdk-ı cevâb ve sıhhat-i mazmûn-ı hüccetine beyyine taleb olundukda, udûl-i müslimînden Mustafa Çelebi b. Veli ve Mehmed Bey b. Mustafa nâm kimesneler li ecli’ş-şehâde meclis-i şer‘a hâzırân olup, fi’l-hakīka müteveffât-ı mezbûre Hatice’nin muhallefâtı beş yüz bin ve otuz bin yedi yüz seksen beş akçe beyne’l-verese kısmet olundukda sagīre-i mezbûrenin hâl-i hayâtında levâzım-ı mühimmesine mezbûr İbrahim Ağa’nın vesâyeten harc ve [2a] sarf ettiği meblağı otuz bin akçe hesâb olunup mezbûr Cafer Bâşe dahi kabûl ve meblağ-ı merkūma müte‘allik da‘vâ ve talebden mezbûr İbrahim Ağa’nın zimmetini ibrâ ve ıskāt ve kassâm-ı merkūm huzûrunda ikrâr ve i‘tirâf edip, hüccet-i mersûme[yi] kassâm-ı mezbûr tahrîr etti, bu husûsa şâhidleriz ve şehâdet ederiz dediklerinde gıbbe’t-ta‘dîl şehâdetleri hayyiz-i kabûlde vâki‘ olup, bu vesîka bi’t-taleb ketb olundu. Tahrîren fi’l-yevmi’l-hâmis aşer min Zilka‘deti’ş-şerîfe li sene isneyn ve ışrîn ve elf. Şuhûdü’l-hâl: El-Hâc Elvan b. Abdullah, Mahmud Efendi el-Kadı, el-Hâc Mustafa b. Mehmed, Mehmed Çelebi b. Abdullah, Bâli b. İsmail, Mustafa b. Mehmed ve gayruhüm.