Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 49 Hüküm no: 21 Orijinal metin no: [7b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Ali b. Abdullah’ın vârislerinin miras hisselerini vekilden aldıkları Hâric-i Galata’da Mustafa Ağa mahallesi sâkinlerinden olup bundan akdem vefât eden el-Hâc Ali b. Abdullah nâm yesârînin evlâd-ı sulbiyesi ve vârisesi Safiye ve Âişe ve kendiden sonra fevt olan Fâtıma’nın vâlidesi Emine bt. Abdullah ve zevci fahrü’l-akrân Hüseyin Çavuş meclis-i şer‘-i hatîr-i lâzımü’t-tevkīrde, işbu râfi‘ü’l-kitâb Mahmud Bey b. Abdülvehhâb mahzarında her biri ikrâr ve takrîr-i kelâm edip, müteveffâ-yı mezbûr el-Hâc Ali’nin muhallefâtından olup beynimizde taksîmi lâzım [olan] on iki tulum sâde yağı ve iki câriye [8a] ve bir gulâmı bey‘a ve semenlerini kabz ve îsâle mezbûr Mahmud Bey’i tevkîl ve menâbımıza inâbet edip, merkūm dahi vekâleten sâlifü’z-zikr tulumlar ile üç esîri cem‘an yüz bir bin beş yüz yetmiş üç akçeye bey‘ edip, meblağ-ı merkūmun dokuz bin üç yüz seksen üç akçesini zikr olunan yağ ve üç esîrin beynimizde ma‘lûm mesârif-i mühimmesine harc ve sarf edip, bâkī kalan doksan iki bin yüz doksan akçesini mezbûr Mahmud Bey’in yedinden bi’t-tamâm ahz ve kabz edip, eşyâ-i mezkûre bahâsından merkūm Mahmud Bey yedinde bir akçe ve bir habbe bâkī kalmadı dedikde, mukırrûn-ı mezbûrûnun vech-i meşrûh üzre cârî olan ikrârlarını el-mukarru lehü’l-merkūm Mahmud Bey bi’l-muvâcehe tasdîk edip, mâ hüve’l-vâki‘ bi’t-taleb ketb olundu. Tahrîren fî evâsıtı Muharremi’l-harâm li sene selâse ve ışrîn ve elf. Şuhûdü’l-hâl: Hüseyin Bey b. Abdullah el-Cündî, Piyâle Bey b. Abdullah el-Bevvâbü’s-sultânî, Mehmed Bey [b.] Abdullah, Hüseyin Çelebi [b.] Hayreddin el-Yesârî, Mahmud [b.] Ferruh el-İmâm, Ali b. Abdullah, Mustafa b. Mustafa ve gayruhüm.