Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 68 Hüküm no: 46 Orijinal metin no: [17a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kurd Reis b. Sinan’ın üvey çocuklarına takdir olunan nafakayı teslim alması Mahmiye-i Galata dâhilinde Emekyemez mahallesi sâkinelerinden olup, bundan akdem vefât eden Zâhide bt. Ali nâm hâtunun zevci Kurd Reis b. Sinan nâm râcil meclis-i şer‘-i şerîfde, müteveffât-ı merkūmenin zevc-i âhardan olan Mahmud ve Mustafa nâm sagīrlerinin kıbel-i şer‘-i şerîfden mansûb vasîleri olan işbu râfi‘ü’l-kitâb el-Hâc İbrahim b. Nureddin mahzarında ikrâr ve takrîr-i kelâm edip, sagīrân-ı mezbûrân benim terbiyemde olmağla hâkimü’ş-şer‘a târih-i kitâbdan dört sene mukaddem nafaka ve kisveleri için beşer akçe takdîr ettirmiş idim, meblağ-ı mefrûz-ı mezkûr dört senelik dört bin dört yüz akçeyi mezbûr el-Hâc İbrahim’in yedinden bi’t-tamâm ahz ve kabz eyledim dedikde, mâ hüve’l-vâki‘ gıbbe’t-tasdîk ve’t-taleb kayd olundu. Tahrîren fî evâsıtı şehri Rebî‘ilâhir li sene selâse ve ışrîn ve elf. Şuhûdü’l-hâl: Yusuf Çelebi [b.] Mustafa, el-Hâc Mustafa [b.] Abdullah, Davud [b.] Bayram, Hasan Dede [b.] Abdullah, Osman Bey [b.] Abdullah el-Cündî, Hasan [b.] İbrahim, Mustafa el-Muhzır, İbrahim el-Muhzır ve gayruhüm.