Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 69 Hüküm no: 47 Orijinal metin no: [17b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kurd Reis b. Ali’nin üvey çocuklarının bazı emlâkini satın alması Mahmiye-i Galata dâhilinde Emekyemez mahallesi sâkinelerinden olup bundan akdem vefât eden Zâhide bt. Ali nâm hâtunun zevci ve vârisi Kurd Reis b. Ali nâm râcil meclis-i şer‘-i şerîfde, müteveffât-ı merkūmenin zevc-i âhardan olan Mehmed ve Mustafa nâm sagīrlerinin kıbel-i şer‘-i şerîfden mansûb vasîleri olan râfi‘ü’l-kitâb el-Hâc İbrahim b. Nureddin mahzarında ikrâr ve takrîr-i kelâm edip, müteveffât-ı mezbûrenin terekesinden olup Yalakābad kazâsında vâki‘ mülk çiftliği bî-garaz ehl-i [müslimîn] takvîmi ile sekiz bin dört akçe ve yine karye-i mezbûrede vâki‘ lede’l-cîrân ma‘lûmetü’l-hudûd bir kıt‘a bağı üç bin üç yüz akçe, cem‘an on bir bin üç yüz dört akçe ve benim dahi ber-mûceb-i defter-i kassâm on bin yedi yüz doksan yedi akçe edip, zikr olunan çiftlik ile bir kıt‘a çiftlik-i merkūmede olan bağı vech-i meşrûh üzre on bir bin üç yüz dört akçeye kabûl ve kendi hisse-i şer‘iyyemden bâkī kalan beş yüz yedi akçeyi vasiyy-i merkūma edâya müte‘ahhid oldum dedikde, mukırr-ı mezbûrun ikrâr-ı meşrûhunu merkūm vasî tasdîk edip ve hâl minvâl-i meşrûh üzre olmağla sagīrân-ı merkūmâna evlâ ve ahrâ olmağın, mâ hüve’l-vâki‘ bi’t-taleb kayd olundu. Tahrîren fî evâili şehri Rebî‘ilâhir li sene selâse ve ışrîn ve elf. Şuhûdü’l-hâl: Yusuf Çelebi b. Mehmed, el-Hâc Mustafa [b.] Abdullah, Davud b. Bayram, Hasan Dede [b.] Abdullah, Hasan b. İbrahim ve gayruhüm.