Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 69 Hüküm no: 48 Orijinal metin no: [17b-2, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Efendi b. Receb’in Rus asıllı câriyesini azat ettiğinin sabit olması Hâric-i mahmiye-i Galata’da vâki‘ Tophâne mahallâtından Selime Hâtun mahallesi sükkânından Ali b. Hüdâverdi, Emine Hâtun bt. Abdullah ve Emine Hâtun bt. Nazar nâm kimesneler meclis-i şer‘-i şerîfde hâzırûn olup, mahmiye-i Galata ve tevâbi‘inde vâki‘ beytülmâlin emîni olan fahrü’l-akrân Murad Ağa b. Abdürrahim kıbelinden husûs-ı âti’z-zikre vekâleti nehc-i şer‘î üzre sâbit olan ve mahalle-i mezbûrede bundan akdem vefât eden merhûm Hasan Efendi b. Receb’in muhallefâtına, zevcesi Âişe bt. Pervâne hâricinde ma‘rûf vârisi olmadığından vaz‘-ı yed eden husûs-ı âti’l-beyânı münkir Osman Bey b. Ali nâm hasm-ı câhid mahzarında, orta boylu, açık kaşlı, gök gözlü, sarışın, Rûsiyyetü’l-asl ve sol eli baş parmağında eser-i cerh bulunan hâmile-i hâze’l-kitâb Kâmile bt. Abdullah’dan sâdır olan da‘vâ-yı sahîha-i şer‘iyyede gıbbe’l-istişhâdi’ş-şer‘î şöyle şehâdet ettiler ki, müteveffâ-i mezbûr Hasan Efendi bizim yanımızda ve katımızda hâl-i hayâtı ve kemâl-i aklında müdde‘iye-i mezbûreyi âzâd ve tahrîr etti. Şehâdetleri ba‘de’t-ta‘dîli’ş-şer‘î ve’t-tezkiyyeti’ş-şer‘iyye inde’ş-şer‘ makbûl ve mu‘teber olmağın mûcebince hükm edildi. Cerâ zâlike ve hurrire fi’l-yevmi’t-tâsi‘ aşere min şehri Rebî‘ilâhir sene selâse ve ışrîn ve elf. Şuhûdü’l-hâl: Mehmed b. Receb el-Münâdî, Mehmed Bey b. Mustafa, Mustafa b. Mehmed, el-Hâc Halil b. Hürrem el-Bezzâzî ve gayruhüm