Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 70 Hüküm no: 51 Orijinal metin no: [19a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nurullah Ağa b. Mahmud Efendi’nin mülk menzil hissesini kız kardeşi Fâtıma Hatun’a satması Mahmiye-i Galata müzâfâtından Tophâne’de Fındıklı nâm mevzi‘de vâki‘ mahalle sükkânından sâbıkan başdefterdâr olup, bundan akdem vefât eden merhûm-ı mebrûr ed-dâricü ilâ rahmeti’l-gafûr Mahmud Efendi b. İbrahim’in sulbî oğlu olan fahrü’z-zu‘amâ Nurullah Ağa meclis-i şer‘-i kavîmde, merhûm-ı mûmâ-ileyhin sulbiye kızı hâmiletü’l-kitâb umdetü’l-muhadderât tâcü’l-mestûrât Fâtıma Hâtun tarafından husûs-ı âti’l-beyânı tasdîka ve semen-i câ’i’z-zikri edâya vekîl olup, hasm-ı şer‘-i câhid mahzarında nehc-i şer‘î üzre vekâleti sâbite olan zevcleri ve sâbıkan Anadolu beylerbeyisi olan emîrü’l-ümerâ’i’l-kirâm kebîrü’l-küberâi’l-fihâm zü’l-kadr ve’l-ihtirâm sâhibü’l-iz ve’l-ihtişâm Ahmed Paşa b. el-merhûm Ali Efendi -dâme izzuhû- hazretleri mahzarlarında ikrâr ve i‘tirâf edip, babam merhûm-ı müşârün-ileyhin terekesinden mahalle-i merkūmede vâki‘ hudûdu bir tarafdan ba‘zen mûmâ-ileyh Ahmed Paşa mülküne ve ba‘zen tarîk-i âma ve bir tarafdan ba‘zen merhûm-ı mûmâ-ileyhin vakıf odalarına ve ba‘zen tarîk-i âma ve bir tarafdan ba‘zen Gülnar Hâtun ve ba‘zen Seyyid b. ( ) mülklerine ve bir tarafdan tarîk-i âma müntehiye olup, muhavvata-i hâriciyyesi beş bâb fevkānî odaları ve bir sofayı ve dehlizi ve tahtlarında kebîr ahırı ve bir matbahı ve diğer tahtânî odayı ve câmekânı ve fevkānî kubbeli bir odayı ve dört diğer fevkānî odaları ve tahtlarında iki bâb odaları ve zikr olunan odalar tahtlarında bir mahzeni ve yine sokak kapısı kurbunda iki bâb fevkānî ve iki bâb tahtânî büyûtu ve dehlizi ve kenîfi ve fırını ve bir kasrı [19b] ve zât-ı eşcâr-ı müsmire hadîkayı ve ortasında şadırvanlı bir kebîr odayı ve câmekânlı bir hamamı ve hamam-ı mezbûra muttasıl dört bâb fevkānî odaları ve altlarında iki bâb diğer odaları ve dehlizi ve havuzlu bi’r-i mâyı ve mezbûre Gülnar Hâtun menzili kurbunda tahtânî ve fevkānî iki bâb odaları ve dehlizleri ve bir tahtânî diğer odayı ve diğer bi’r-i mâ’ı müştemil ve muhavvata-i dâhiliyyesi tahtânî ve fevkānî iki hamamı ve câmekânı ve külhanı ve fırını ve su mahzenini ve orta kapı üstünde fevkānî odalı ve üç bâb tahtânî ve üç bâb fevkānî odayı ve üç bâb tahtânî ve üç bâb fevkānî büyûtu ve üç sofayı ve bir şehnişîni ve bir matbahı ve kenîfi ve diğer üç bâb tahtânî büyûtu ve iki sofayı ve tahtlarında bir kebîr kileri muhtevî olan menzil cemî‘-i levâhıkı ile ve menzil-i mezbûra karîb Ayas Paşa Bahçesi kurbunda vâki‘ inde’l-ahâlî ve’l-cîrân hudûdu ma‘lûme olup, iki bâb tahtânî evleri ve dehlizi ve havlıyı sâlifü’z-zikr menzile cereyân eder aynı ve eşcâr-ı müsmire ve gayr-ı müsmireyi müştemile olan hadîka kâffe-i merâfıkı ile cümle yirmi bir sehim olup, irsle babam merhûm-ı mebrûr-ı müşârün-ileyhden bana intikāl eden iki sehim ve kız karındaşım İstemihan’dan iştirâ edip mülk-i müşterâm olan bir sehim, cem‘an üç sehim hisse-i şâyi‘amı, müşârün-ileyh paşa hazretlerinin müvekkilesi mezbûre Fâtıma Hâtun’a doksan yedi bin nakd-i râyic fi’l-vakt fıddî-i Osmânî akçeye bey‘-i bâtt-ı sahîh-i şer‘î ile bey‘ ve teslîm-i mebî‘ edip, meblağ-ı mezbûr doksan yedi bin akçeyi vekîl-i mûmâ-ileyh Ahmed Paşa hazretleri yedinden bi’t-tamâm ve’l-kemâl alıp kabz eyledim. Ba‘de’l-yevm hisse-i merkūme mezbûre Fâtıma Hâtun’un mülk-i müşterâsıdır, keyfe mâ yeşâ’ mutasarrıfe olsun dedikde, mukırr-ı merkūmun ikrâr-ı meşrûhunu vekîl-i mûmâ-ileyh Ahmed Paşa hazretleri bi’l-vekâle vicâhen tasdîk ve tahkīk etmeğin, mâ hüve’l-vâki‘ bi’t-taleb ketb ve tahrîr olundu. [20a] Tahrîren fî evâhiri şehri Rebî‘ilâhir li sene selâse ve ışrîn ve elf. Şuhûdü’l-hâl: Fahrü’l-müderrisîni’l-izâm Abdülbâkī b. el-merhûm Yahya Efendi, fahrü’l-kuzât Mustafa Efendi b. Bâli, fahrü’l-kuzât Mustafa Efendi b. Mesih, fahrü’l-müderrisîn Yusuf Efendi b. Hamza, fahrü’l-kā’idîn Yusuf Çavuş b. Abdülmennân, fahrü’l-a‘yân Mustafa b. Ali, fahrü’l-eimme Mehmed b. eş-Şeyh Pîrî, Ali Bey b. Abdülmennân es-Sarrâc, Hüsrev Bey b. Abdullah el-Cündî, Mahmud Çavuş b. İbrahim, Mahmud Çelebi b. Ahmed Çavuş ve gayruhüm.