Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 75 Hüküm no: 58 Orijinal metin no: [21b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Mahmud Efendi’nin satın aldığı menzil ve bahçenin vekili tarafından teslim alınması Mahmiye-i Galata müzâfâtından Tophâne’de Fındıklı mahallesi sükkânından sâbıkan başdefterdâr olup vefât eden merhûm-ı mebrûr ed-dâricü ilâ medârici rahmeti’l-gafûr Mahmud Efendi b. İbrahim’in sulbiye kızı ve vârisesi umdetü’l-muhadderât zübdetü’l-muvakkarât Kerime Hâtun tarafından zikri âtî menzil ve hadîkadan hisse-i şâyi‘asını bey‘ ve teslîm ve semenini ahz ve kabza iddi‘â-i vekâlet eden [22a] zevci fahrü’l-müderrisîni’l-kirâm zahrü’l-müdakkikīni’l-fihâm Abdülbâkī Efendi b. Yahya meclis-i şer‘-i kavîmden merhûm-ı mûmâ-ileyhin sulbiye kızı hâmiletü’l-kitâb umdetü’l-muhadderât tâcü’l-mestûrât Fâtıma Hâtun tarafından mebî‘-i âti’z-zikri iştirâya ve semenini edâya vekîl olup, hasm-ı câhid mahzarında nehc-i şer‘î üzre vekâleti sâbite olan zevcleri ve sâbıkan Anadolu beylerbeyisi olan emîrü’l-ümerâ’i’l-kirâm kebîrü’l-küberâi’l-fihâm zü’l-kadr ve’l-ihtirâm Ahmed Paşa b. el-merhûm Ali Efendi hazretleri mahzarlarında ikrâr ve i‘tirâf edip, müvekkilem mezbûre Kerime’nin babası merhûm-ı müşârün-ileyhin terekesinden mahalle-i merkūmede vâki‘ hudûdunun bir tarafı ba‘zen müşârün-ileyh Ahmed Paşa mülküne ve ba‘zen tarîk-i âma ve bir tarafı ba‘zen merhûm-ı mûmâ-ileyhin vakıf odalarına ve ba‘zen tarîk-i âma ve bir tarafı ba‘zen Gülnar Hâtun ve ba‘zen Seyyid ( ) mülklerine ve bir tarafı tarîk-i âma müntehiye olup muhavvata-i hâriciyyesi beş bâb fevkānî odaları ve bir sofayı ve dehlizi ve tahtlarında kebîr ahırı ve bir matbahı ve âhar tahtânî odayı ve câmekânı ve fevkānî kubbeli bir odayı ve dört bâb âhar fevkānî odaları ve tahtlarında iki bâb ve zikr olunan odalar tahtlarında bir mahzeni ve yine sokak kapısı kurbunda iki bâb fevkānî ve iki bâb tahtânî odaları ve dehlizi ve kenîfi ve fırını ve bir kasrı ve zât-ı eşcâr-ı müsmire hadîkayı ve ortasında şadırvanlı bir kebîr odayı ve bir câmekânı ve bir hamamı ve hamam-ı mezbûra muttasıl dört fevkānî odaları ve altlarında iki bâb âhar odaları ve dehlizleri ve havuzlu ve bi’r-i mâ’ı ve mâ-ı cârî ve mezbûr Gülnar Hâtun menzili kurbunda tahtânî ve fevkānî iki bâb odaları ve dehlizleri ve bir tahtânî diğer odayı ve mâ-ı cârîyi müştemil ve bir muhavvata-i dâhiliyyesi tahtânî ve fevkānî iki hamamı ve bir câmekânı ve külhanlığı ve fırını ve su mahzeni ve orta kapı üstünde fevkānî odayı ve üç bâb fevkānî büyûtu ve üç sofayı ve bir şehnişîni ve bir matbahı ve kenîfi ve diğer üç bâb tahtânî büyûtu ve iki sofayı ve tahtlarında bir kebîr kileri müştemile olan menzil cemî‘-i levâhıkı ile hâlâ cümle [22b] yirmi bir sehim olup zikr olunan sihâmdan bi tarîki’l-irs müvekkilem mezbûre Kerime’[ye] intikāl eden bir sehim hisse-i şâyi‘asını ve menzil-i mezbûra karîb merhûm-ı mûmâ-ileyh Mi‘mârzâde İbrahim Efendi’den iştirâ eylediği Ayas Paşa Bahçesi kurbunda vâki‘ inde’l-ahâlî ve’l-cîrân hudûdu ma‘lûme olup, iki bâb tahtânî evleri ve dehlizi ve suyu sâlifü’z-zikr menzile cereyân eder aynı ve eşcâr-ı müsmire ve gayr-ı müsmire[yi] müştemile olan hadîka kâffe-i merâfıkı ile cümle beş yüz elli iki sehim olmak üzre bi tarîki’l-irs müvekkileme intikāl eden on yedi sehim hisse-i şâyi‘ası safka-i vâhide ile otuz üç bin akçeye vekîl-i müşârün-ileyh hazretlerine müvekkilesi mezbûre Fâtıma Hâtun için bi’l-vekâle bey‘-i bâtt-ı sahîh-i şer‘î ile bey‘ ve kabz-ı semen edip, hâlâ zikr olunan mebî‘leri vekîl-i mezbûr Ahmed Paşa hazretleri tesellümden imtinâ‘ ederler, vech-i mübeyyen üzre zikr olunan mebî‘leri tesellüme vekîl-i mezbûr hazretlerine emr-i şer‘î kılınmak taleb ederim deyip, vekîl-i mezbûr hazretleri istintâk olundukda, mûmâ-ileyh Abdülbâkī Efendi hazretleri müvekkile-i mezbûre tarafından vekâleti[ni] şer‘an isbât eylemediği ecilden mebî‘-i mezbûru kabz eylemedim, müvekkilem yedinden mebî‘ayn-i merkūmeyne noksân terettüb edip, müvekkile-i mezbûre Kerime Hâtun vekâletini inkâr ederse müvekkileme zarar isâbet eder, merkūm efendi hazretleri şer‘an vekâletleri isbât eylesinler deyû vekâletin münkir olmağın, mezbûr Abdülbâkī Efendi’den minvâl-i meşrûh üzre vekâletine beyyine taleb olundukda, müvekkile-i mezbûreyi ârifeyn olan li eb karındaşı umdetü’l-a‘yân Nurullah Çelebi ve Yusuf Efendi b. Hamza meclis-i şer‘a li ecli’ş-şehâde hâzırân olup, fi’l-vâki‘ mezbûre Kerime Hâtun zikr olunan hudûdlar ile mahdûd olan cümle menzilden ve hadîkadan vech-i mübeyyen üzre hisse-i şâyi‘asını <> [23a] merkūme Fâtıma Hâtun’a bey‘a ve semenini kabza ve teslîme zevci mezbûr Abdülbâkī Efendi mahzarında tarafından vekîl ve nâib-i menâb nasb eyledi. Merkūme Kerime mezbûr Abdülbâkī Efendi’yi tarafından vekîl nasb eylediğine şâhidleriz, şehâdet dahi ederiz deyû gıbbe’l-istişhâd edâ-i şehâdet-i şer‘iyye eylediklerinde, [ba‘de’t-] ta‘dîl ve’t-tezkiyye şehâdetleri hayyiz-i kabûlde vâkı‘a olmağın, mûcebiyle sıhhat-i vekâlet-i mezbûreye hükm olundukdan sonra zikr olunan menzil ve hadîkadan iştirâ eylediği hisseleri tesellüme vekîl-i mezbûr Ahmed Paşa hazretlerine emr olunup, mâ hüve’l-vâki‘ bi’t-taleb ketb olundu. Tahrîren fî evâhiri şehri Rebî‘ilâhir li sene selâse ve ışrîn ve elf. Şuhûdü’l-hâl: Fahrü’l-müderrisîni’l-kirâm Abdülbâkī Efendi b. Yahya, fahrü’l-kuzât Mustafa Efendi b. Bâli, Mehmed Efendi b. Mesih el-Müderris, Yusuf Efendi b. Hamza el-Müderris, fahrü’l-a‘yân Yusuf Ağa b. Abdürrahim el-Müteferrika-i Dergâh-ı âlî, fahrü’l-a‘yân Osman Çavuş b. Mehmed, fahrü’l-a‘yân Mustafa b. Ali, fahrü’l-a‘yân Mahmud Çavuş b. İbrahim.