Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 77 Hüküm no: 60 Orijinal metin no: [23b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kapudan Halil Paşa’nın mirî esir Tomaş v. Nikola’yı azat etmesi Bi’l-fi‘l kapudân olup hazret-i pâdişâh-ı âlem-penâh hazretlerinin cânib-i hümâyûnlarından mîrî üserânın ıtkına me’zûn olan sâhibü’s-sa‘âdeti’l-uzmâ Halil Paşa hazretlerinin cânib-i âlîlerinden husûs-ı âti’z-zikre vekîl olup, İsmail Çelebi b. Mustafa ve Mahmud Çavuş b. Mustafa şehâdetleri ile vekâleti sâbite olan Mahmud Ağa b. Abdülmennân mahfil-i kazâda bi’l-vekâle ikrâr ve i‘tirâf edip, işbu bâ‘isü’l-kitâb orta boylu açık kaşlı elâ gözlü buğday enlu ak sakallı Hırvadiyyü’l-asl Tomaş v. Nikola nâm kâfir müddet-i medîde Tersâne-i Âmire hizmetinde olup amel-mânde olmağın, müvekkil-i mûmâ-ileyh hazretleri bi izni’s-sultânî mezbûr Tomaş’ı i‘tâk eyledi. Cânib-i şer‘-i şerîfden ıtknâmesi verilmesi taleb olunur dedikde, ıtknâmesi tahrîr olunup yedine vaz‘ olundu ki, lede’l-hâce ihticâc edine. Tahrîren fî evâsıtı Cemâziyelevvel li sene selâse ve ışrîn ve elf. Şuhûdü’l-hâl: Mustafa Bey b. İbrahim el-Bevvâbü’[s]-sultânî, fahrü’l-a‘yân Ahmed Çavuş b. ( ) Ser-çavuşân, Nasuh Kethüdâ b. Hamza, fahrü’l-akrân Mehmed Çavuş b. İbrahim, Mehmed b. Abdullah Kapudân, Mustafa b. İbrahim ve gayruhüm.