Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 87 Hüküm no: 71 Orijinal metin no: [27b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Râbia Hatun Vakfı’nın eski mütevellisi vasîlerinin zimmetinin ibra edilmesi Medîne-i Hazret-i Ebî Eyyûb el-Ensârî -radiye anhu Rabbühü’l-Bârî-de merhûme Râbia Hâtun vakfı’na bi’l-fi‘l mütevellî olan Bayezid b. Musa meclis-i şer‘-i şerîfde, vakf-ı mezbûra mütevellî olup medîne-i mezbûrede Baba Haydar mahallesinde sâkin iken maktûlen fevt olan Ahmed Halîfe b. Mustafa nâm müteveffânın sulbî sagīr oğlu Davud’un vasiyy-i şer‘îsi İlyas b. Yakub ve sulbî kebîr oğlu Mehmed nâm kimesneler mahzarında bi’t-tav‘i’s-sâf ikrâr ve i‘tirâf edip, vakf-ı mezbûrun merhûm Ahmed Halîfe yedi ile zimem-i nâsda olan elli bin akçesinin kırk beş bin beş yüz otuz beş akçesini zimemin her birinden kabûl edip, her birinin rehinlerine kabz eyledim. Bâkī dört bin dört yüz altmış beş akçeden gayrı vakf-ı mezbûr akçesine müte‘allik merkūmân İlyas ve Mehmed ile da‘vâ ve nizâ‘ım kalmadı dedikde, mukırr-ı merkūmun kelimât-ı meşrûhasını merkūmân İlyas ve Mehmed talebleri ile ketb olunup, yed-i tâlibe vaz‘ olundu. Tahrîren fî evâili Cumâdelâhire li sene selâse ve ışrîn ve elf. Şuhûdü’l-hâl: Fahrü’l-a‘yân Mehmed Ağa b. Hüseyin, fahrü’l-a‘yân Mahmud Bey b. Hüseyin, fahrü’l-a‘yân Hasan Bey b. Nezir, Bayram Halîfe b. Şükrullah, Sadi Halîfe b. Bünyad, Mehmed [b.] Ferruh, Hasan Dede b. Dede? ve gayruhüm.