Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 87 Hüküm no: 72 Orijinal metin no: [28a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kapudan Ali Paşa Câmi‘i hatibi Şeyh Mehmed Efendi’nin vakfın eski mütevellisindeki alacağının tahsil olunması Hâric-i Galata’da Tophâne’de vâki‘ merhûm-ı mebrûr Kapudân Ali Paşa hazretleri câmi‘-i şerîfinde bi’l-fi‘l hatîb olan umdetü’l-hutebâ eş-Şeyh Mehmed Efendi b. eş-Şeyh Ahmed meclis-i şer‘-i kavîmde, merhûm-ı mûmâ-ileyhin vakfına mütevellî olup vefât eden Mehmed Ağa b. Abdülmennân’ın sulbî sagīr oğlu Derviş’in tesviye-i umûruna vasiyy-i muhtâr olduğu bimâ hüve tarîkü’s-sübût şer‘an sâbit olup, muhallefâtına bi hasebi’l-vesâye vaz‘-ı yed eden Hüseyin Çelebi b. Behram ve yine kebîr oğlu Ali Çelebi ve kebîre kızı Fâtıma tarafından husû[s]-ı âti’l-beyânın istimâ‘ına vekîl olup, nehc-i şer‘î üzre vekâleti sâbite olan Kurd Çelebi b. Mustafa ve yine zevce-i metrûkesi Âişe bt. Rıdvan nâm hâtun tarafından kezâlik husûs-ı câ’i’z-zikrin istimâ‘ına vekîl olup, nehc-i şer‘î üzre vekâleti sâbite olan el-Hâc Cafer Bey b. el-Hâc Mehmed mahzarlarında üzerlerine takrîr-i da‘vâ edip, müteveffâ-yı mezbûr Mehmed Ağa zamân-ı tevliyyetinde vakf-ı mezbûrdan berât-ı pâdişâhî ile mutasarrıf olduğum yevmî seksener akçe vazîfemden bin on altı Muharremi gurresinden bin yirmi senesi Zilhiccesi’nin gāyetine gelince ellişer akçesin bana teslîm edip, otuzar akçesin bana teslîm etmemiş iken zikr olunan beş senelerin mümzâ ve mahtûm muhâsebe defterlerine seksener akçeyi bi’t-tamâm kayd edermiş, bu takdîrce müteveffâ-yı mezbûrun zimmetinde cem‘an elli dört bin akçe hakkım bâkī kalmış olur, hâlâ muhallefâtından taleb ederin dedikde, gıbbe’s-suâl merkūmûn Hüseyin Çelebi ve Ali Çelebi ve Kurd Çelebi ve el-Hâc Cafer Bey cevâba mütesaddî olup, müteveffâ-yı mezbûr Mehmed Ağa zikr olunan senelerin muhâsebât defterlerinde yevmî seksener akçeyi bi’t-tamâm kayd ettirip ve lâkin müşârün-ileyh eş-Şeyh Mehmed Efendi’ye bi’t-tamâm teslîm ve îfâ edip zimmetini berî eylemişdir deyû cevâb verip, gıbbe’l-inkâr, sıdk-ı makāllerine beyyine taleb olundukda, beyyineden âcizler olup mûmâ-ileyh eş-Şeyh Mehmed Efendi’ye minvâl-i meşrûh üzre meblağ-ı merkūm elli dört bin akçeyi müteveffâ-yı merkūmun hayâtında asâleten ve vekâleten bi’t-tamâm alıp kabz ve istîfâ etmediğine yemîn teklîf olunsun dediklerinde, müşârün-ileyh eş-Şeyh Mehmed Efendi’ye minvâl-i meşrûh üzre yemîn teklîf olunup, ol dahi yemîn billâhi’l-aliyyi’l-a‘lâ ettikden sonra meblağ-ı merkūm elli dört bin akçenin otuz bin akçesin müteveffâ-yı mezbûrun muhallefâtından edâya mezbûrlara tenbîh birle, bu vesîka ketb ve tahrîr olunup yed-i tâlibe vaz‘ ve def‘ olundu. Tahrîr fî evâili Cumâdelâhire li sene selâse ve ışrîn ve elf. Şuhûdü’l-hâl: Ramazan Efendi b. Mustafa el-Müderris, Receb Halîfe b. Ârif el-İmâm, Mahmud Efendi b. Muharrem el-İmâm, Abdülkādir Efendi b. el-Hâc ( ), Mehmed Çelebi b. Ali el-İmâm, el-Hâc Ömer b. Nesimi, Ömer b. Abdullah ve gayruhüm.