Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 90 Hüküm no: 75 Orijinal metin no: [29b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Mehmed Ağa’nın bahçe hissesini kardeşi Ali Çelebi’ye satması Mahrûse-i Galata müzâfâtından Beşiktaş mahallesinde sâkin iken vefât eden merhûm Mehmed Ağa’nın sulbiye kızı Fâtıma Hâtun tarafından hadîka-i âtiyyetü’z-zikrden hisse-i şâyi‘asını bey‘ ve semenini kabz ve kendiye îsâle vekîl olup, nehc-i şer‘î üzre vekâleti sâbite olan fahrü’l-eşbâh Kurd Çelebi b. Mustafa meclis-i şer‘-i şerîfde müteveffâ-yı mezbûrun sulbî oğlu Ali Çelebi mahzarında bi’l-vekâle ikrâr ve i‘tirâf edip, müteveffâ-yı mezbûrun terekesinden mahalle-i merkūme kurbunda vadide vâki‘ hudûdunun bir tarafı ba‘zen tarîk-i âm ve ba‘zen Mustafa ve Râziye Hâtun bağları ve ba‘zen vâdi ve ba‘zen Murad Ağa bağına ve bir tarafı Yanaki zimmî bağına ve bir tarafı ba‘zen Behram Ağa bağ ve bahçesine ve ba‘zen el-Hâc Mahmud bağına ve ba‘zen üstâd Ali bağına ve ba‘zen Hürmüz nâm zimmî bağına müntehiye olup, iki bâb tahtânî odaları ve iki sofayı ve bir ahırı ve iki dolap kapısını ve iki havuz ve havuz üstünde tahtadan binâ olunmuş bir kasrı ve kenîfi ve bağı ve bostanı muhteviye olup kırk sehim farz olunan hadîkadan müvekkile-i merkūme Fâtıma’ya bi tarîki’l-irs intikāl eden yedi sehim hisse-i şâyi‘asını, vekâlet-i mahkiyem hasebiyle karındaşı merkūm Ali Çelebi’ye on iki bin iki yüz elli akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i müsemmen-i mahdûd eyledim. Ba‘de’l-yevm zikr olunan hisse-i merkūm Ali Çelebi’nin mülk-i müşterâsıdır keyfe mâ yeşâ’ ve yahtâr mutasarrıf olsun dedikde, vekîl-i merkūm Kurd Çelebi’nin ber vech-i meşrûh bi’l-vekâle sudûr eden ikrârın merkūm Ali Çelebi dahi vicâhen tasdîk ve tahkīk etmeğin, mâ hüve’l-vâki‘ bi’t-taleb ketb olunup, yed-i tâlibe vaz‘ ve def‘ olundu. Tahrîren fî evâili Cumâdelâhire li sene selâse ve ışrîn ve elf. Şuhûdü’l-hâl: Cafer b. Abdullah, Receb Halîfe b. Ârif, Abdülkādir Halîfe b. Abdullah, Mustafa b. Hüseyin Bey, Pîrî Çelebi b. Hüseyin Bey, Sıdkı b. Mehmed, el-Hâc Cafer Bey b. el-Hâc Mehmed ve gayruhüm.