Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 89 Hüküm no: 74 Orijinal metin no: [29a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yakub Bey b. Abdullah’ın, karısının terekesinden herhangi bir şeyin saklanmadığına dair yemin etmesi Bi’l-fi‘l beytülmâl emîni olan fahrü’l-akrân Murad Çavuş b. Abdülmennân kıbelinden mahmiye-i Galata’da vâki‘ beytülmâl husûsuna vekîl Osman Çelebi b. Ali mahmiye-i mezbûre dâhilinde vâki‘ Sultan Bayezid mahallesinde vefât eden Fâtıma bt. Abdullah nâm hâtunun zevci olan Yakub Bey b. Abdullah nâm sipâhi[yi] mahfil-i kazâya ihzâr ve mahzarında takrîr-i kelâm ve ta‘bîr ani’l-merâm edip, mezbûre Fâtıma’nın muhallefâtı tahrîr olundukda, cem‘an bin beş yüz akçe muhallefâtı zuhûr edip sülüs malını vasiyyet etmeğin, beş yüz akçesini mezkûre Fâtıma’nın techîz ve tekfînine sarf olunup, beş yüz akçesi dahi zevc-i mezkûr Yakub Bey’e verilip mîrî cânibine ancak beş yüz akçe kaldı. Mîrîye gadrdir, mezkûre müteveffâtın altın bilezik ve altın istefani ve altı başı ve dahi ba‘zı altın ve inci eşyâsı varmış deyû istimâ‘ [o]lundu, suâl olunsun dedikde, gıbbe’s-suâl ve’l-inkâr mezbûr Yakub Bey tahrîr olunan esbâbdan mâ‘adâ mezkûre hâtunun muhallefâtından ba‘zı esbâb saklamayıp, hîle ve hud‘a etmediğine istihlâf olundukda, half billâhi’l-aliyyi’l-azîm eylediğinde, bu vesîka-i enîka alâ mâ hüve’l-hakīka gıbbe’t-taleb ketb ve imlâ olunup, yed-i tâlibe vaz‘ olundu. Lede’l-hâce müzekkir mâ-cerâ ola. Cerâ zâlik. Ve hurrire fî evâili âhiri’l-Cumâdeyn li sene selâse ve ışrîn ve elf. Şuhûdü’l-hâl: Mahmud Halîfe b. Muharrem el-İmâm, Kadri Çelebi b. Mustafa, Abdülkādir [b.] Abdünnebi, el-Hâc Ömer b. Nesimi, Kurd Çelebi b. Mustafa, fahrü’l-a‘yân Şeyh Mehmed Efendi b. Ahmed, Cafer b. Mehmed, Mehmed b. Ali, Hızır b. Abdullah ve gayruhüm.