Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 115 Hüküm no: 113 Orijinal metin no: [38b-3, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mahmud Çavuş b. Ahmed’in Âlime bt. Behram’a sekiz bin akçe borcu olduğu Udûlden fahrü’l-eimme Mustafa Halîfe b. Ali ve İbrahim b. İsa nâm kimesneler, Hazret-i Ebî Eyyûb el-Ensârî -aleyhi rahmetü’l-meliki’l-Bârî- mahallâtından Davud Ağa mahallesinde sâkin iken bundan akdem vefât eden merhûm Mahmud Çavuş b. Ahmed’in vasiyyetlerinin tenfîzine vasiyy-i muhtâr olan, husûs-i âti’z-zikri münkir kıdvetü’l-akrân Solak Hürrem Bey b. Hasan nâm hasm-ı câhid mahzarında ve müteveffâ-yı mezkûrun zevi’l-erhâm cihetinden vârisi olup yine husûs-ı âti’z-zikri münkire Âişe bt. Mehmed nâm hâtunun mahzarında meclis-i şer‘-i şerîfde hâzırân olup bâ‘isetü [39a] hâze’l-kitâb Âlime bt. Behram nâm hâtundan sâdır olan da‘vâ-yı sahîha-i şer‘iyyede gıbbe’l-istişhâdi’ş-şer‘î şöyle şehâdet ettiler ki, müteveffâ-yı mezkûr hâl-i hayâtında bizim yanımızda ve katımızda, üzerinde ve zimmetinde müdde‘iye-i mezbûrenin deyn-i şer‘î cihetinden lâzımü’l-edâ ve vâcibü’l-kazâ râyicü’l-vakt sekiz bin akçe hakkı olduğunu ikrâr ve i‘tirâf etti. Müdde‘iye-i mezbûreye meblağ-ı merkūmu müteveffâ-yı mesfûrdan hâl-i hayâtında kısmen veya tamâmen almadığına, bi vechin mine’l-vücûhi’ş-şer‘iyye zimmetini ibrâ etmediğine dâir yemîn verilmesinin ardından, şehâdetleri ba‘de’t-ta‘dîli’ş-şer‘î ve’t-tezkiyyeti’ş-şer‘iyye inde’ş-şer‘ makbûl ve mu‘teber olmağın mûcebince hükm edildi. Cerâ zâlike ve hurrire fî evâili Şa‘bâni’l-mu‘azzam sene selâse ve ışrîn ve elf. Şuhûdü’l-hâl: Abdurrahman Efendi b. el-Hâc Hasan, Ahmed b. Hasan, Behram b. Abdullah, Mustafa b. Behram er-Râcil, Ali b. Yusuf, Maden Halîfe b. Murad el-İmâm, Abdullah Halîfe b. Maden el-İmâm, Hüsameddin b. Abdurrahman ve gayruhüm mine’l-hâzırîn