Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 116 Hüküm no: 114 Orijinal metin no: [39a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mahmud Çavuş b. Ahmed’in terekesi olan evin vârisleri ve vasîsi tarafından Süleyman Bey b. Abdülmennân’a satılması Medîne-i Hazret-i Ebî Eyyûb el-Ensârî -radiye anhu Rabbühü’l-Bârî- mahallâtından Davud Ağa mahallesinde sâkin iken vefât eden Mahmud Çavuş b. Ahmed nâm müteveffânın vesâyâsını tenfîze vasiyy-i muhtârı olduğu tarîk-i mu‘teber ile sâbit olup, hâlâ Solaklar kethüdâsı olan fahrü’l-akrân Âl Hürrem Bey b. Hasan ve yine müteveffâ-yı mezbûrun li eb karındaşı kızı ve vârisesi Âişe Hâtun bt. Mehmed ve zevce-i metrûkesi Gencâsa bt. Abdullah meclis-i şer‘-i şerîfde, mahmiye-i Kostantıniyye yeniçeriler ağası sarayı kurbunda sâkin fahrü’l-akrân Süleyman Bey b. Abdülmennân nâm cündî mahzarında her biri ikrâr-ı sahîh-i şer‘î edip, müteveffâ-yı mezbûrun terekesinden mahalle-i merkūmede vâki‘ cevânib-i erba‘asının hudûdu mezbûr Âl Hürrem Bey mülkü ve taşçı Ali mülkü ve ba‘zan Dilsiz vakfı ve ba‘zan mekābir-i müslimîn ve ba‘zan Nâzenin Hâtun mülkü ve tarîk-i âma müntehiye olup, dört bâb fevkānî odaları ve altında üç mahzeni ve iki ahırı ve fevklerinde iki odayı ve iki sofayı ve iki su kuyusunu ve zât-ı eşcâr-ı müsmire hadîkayı ve üç kenîfi muhtevî olan menzil bey‘ için kirâren mecâlis-i tâlibîn ve râgıbîne arz ve mirâren sûk-ı sultânîde müzâyede olunup, rağabât-ı nâs münkatı‘a oldukdan sonra merkūm Süleyman Bey üzerinde seksen bin akçe[de] karâr etmeğin, menzil-i mezbûru bi cümleti’t-tevâbi‘ ve’l-levâhık merkūm Süleyman Bey’e meblağ-ı merkūm seksen bin akçeye bey‘-i bâtt-ı sahîh-i şer‘î ile bey‘ edip, semen-i mezbûrun sülüsünü bi’l-vesâye ve sülüsânını bi’l-verâse mezbûr Süleyman Bey yedinden ahz ve kabz ve tesellüm edip, def‘-i mebî‘-i mezkûr eyledik. Min ba‘d merkūm Süleyman Bey’in dâhil-i havza-i tasarrufu olup mülk taht ve tasarrufu olmuşdur dediklerinde, mukırrûn-ı mezbûrûnu ikrâr-ı meşrûhlarında merkūm Süleyman Bey vicâhen tasdîk ettikden sonra mâ hüve’l-vâki‘ gıbbe’t-taleb ketb olundu. Tahrîren fî evâili Şa‘bâni’l-mu‘azzam li sene selâse ve ışrîn ve elf. Şuhûdü’l-hâl: Fahrü’l-kuzât Abdurrahman Efendi b. el-Hâc Hasan, Maden Halîfe b. Murad el-İmâm, Abdullah Halîfe b. Maden el-İmâm, Mustafa Halîfe b. Ali el-İmâm, Hüsam Halîfe b. Abdurrahman, Davud Halîfe b. Ali el-Müezzin, Ali Bey b. Ali el-Cündî, Ali b. Abdullah, Yusuf b. Hüseyin, Mustafa b. Behram er-Râcil, Cafer b. Abdullah, Ahmed b. Hasan ve gayruhüm mine’l-hâzırîn.