Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 655 Hüküm no: 838 Orijinal metin no: [101a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Belkıs bt. Abdullah’ın, Ali Efendi b. Mahmud’dan muhâlaa yoluyla boşandığı Mahmiye-i İstanbul’da Tarsusî mahallesi sâkinelerinden Belkıs bt. Abdullah nâm hâtun tarafından husûs-ı âti’l-beyâna vekîl olduğu vech-i şer‘î üzre mazmûnu müsbit yedinde olan hüccet-i şer‘iyye ile şer‘an sâbit olan Ali Efendi b. Mahmud nâm kimesne meclis-i şer‘-i şerîfde müvekkile-i mezbûrenin zevci bâ‘isü’l-kitâb Hacı Hasan b. Abdullah nâm bevvâb-ı sultânî mahzarında ikrâr ve takrîr-i kelâm edip müvekkile-i mezbûre zevci merkūm Hacı Hasan ile zimmetinde mütekarrir ve ma‘kūdun-aleyh olan on bin akçe mehr-i müeccel-i müsemmâsı ve nafaka-i iddet-i mu‘ayyene-i ma‘lûmesi üzerlerine ve me’ûnet-i süknâsı dahi kendi üzerine olmak üzre muhâla‘a-i sahîha-i şer‘iyye edip ol dahi hul‘-ı mezbûru kabûl eyledikden sonra zevciyyete ve gayra müte‘allika âmme-i de‘âvî ve mütâlebâtdan her biri âharı ibrâ-i âmm-ı kātı‘ü’n-nizâ‘la ibrâ ve iskāt eylediler dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâdî aşer min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Mustafa Efendi b. Ramazan el-İmâm, el-Hâc Ali b. Mahmud, İbrahim Çelebi b. İshak müezzin, Hasan Çelebi b. Abdullah, Kenan b. Abdullah, İbrahim Çelebi b. Ahmed.