Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 654 Hüküm no: 837 Orijinal metin no: [101a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed b. Hüseyin’in, Ömer Ağa b. Hızır’ın emriyle yaptığı değirmenin bedelini talep ettiği Mahmiye-i İstanbul’da Kızıltaş mahallesi sâkinlerinden Ahmed b. Hüseyin nâm kimesne meclis-i şer‘-i şerîfde Ömer Ağa b. Hızır nâm kimesne mahzarında takrîr-i da‘vâ edip mezbûr Ömer Ağa mahalle-i mezbûrede vâki‘ icâreteyn-i ma‘lûmeteyn ile tasarrufunda olup çakıl ekmeği fırınında malın ile bir horos değirmen binâ ediver ve her ne mikdâr masrûfun gider ise sana vereyim demekle ben dahi ana binâen zikr olunan fırında malım ile bundan akdem bir horos değirmeni binâ edip muvâcehesinde keşf ve tahmîn ettirdiğimde on iki bin sekiz yüz akçe masrûfum zuhûr etmeğin suâl olunup meblağ-ı mezbûrun merkūm Ömer Ağa’dan alıverilmesi matlûbumdur dedikde gıbbe’s-suâl mezbûr Ömer Ağa müdde‘î-i mezbûra vech-i muharrer üzre emrini inkâr edicek müdde‘î-i mezbûrdan müdde‘âsını mübeyyine beyyine taleb olundukda mahmiye-i mezbûrda Kızılmusluk mahallesi sâkinlerinden Ali Beşe b. Abdullah ve Kara Mehmed b. Ali nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka mezbûr Ömer Ağa müdde‘î-i mezbûra zikr olunan değirmende malın ile bir horos değirmeni binâ eylediver, her ne mikdâr masrûfun gider ise sana vereyim deyû müdde‘î-i mezbûra bizim huzûrumuzda emr etmeğin müdde‘î-i mezbûr dahi zikr olunan fırında bundan akdem malıyla bir horos değirmeni binâ edip mezbûr Ömer Ağa muvâcehesinde keşf ve tahmîn ettiğinde on iki bin sekiz yüz akçe masrûfu zuhûr eylemiş idi, biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde şâhidân-ı mezbûrânı ta‘dîl ve’t-tezkiyye için küttâb-ı mahkemeden mevlânâ Sofu Mehmed Efendi b. Mustafa irsâl olunup ol dahi zikr olunan Kızıl Musluk mahallesine varıp ahâlîsinden şâhidân-ı mezbûrânın keyfiyyet-i ahvâlini suâl eyledikde mahalle-i mezbûre İmâmı es-Seyyid Mehmed Efendi b. Mustafa, Mustafa b. Derviş ve el-Hâc İbrahim b. Receb ve Ahmed b. Mustafa ve Bayram Beşe b. Abdullah ve İbrahim b. Abdullah ve Hasan b. Mahmud nâm kimesnelerden her biri şâhidân-ı mezbûrân için adl ve makbûlü’ş-şehâdelerdir dediklerinde mevlânâ-yı mezbûr mahallinde tahrîr ba‘dehû ma‘an irsâl olunan Hasan b. Ahmed ile meclis-i şer‘a gelip alâ vukū‘ihî inhâ ve takrîr etmeğin mûcebince ba‘de’l-hükm mâ hüve’l-vâki‘ bi’t-taleb ketb olundu. Fi’l-yevmi’l-âşir min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Mehmed Çelebi b. Abdullah, İbrahim Çelebi b. Ahmed, Baba Resul b. Rıdvan, Mehmed b. Ramazan.