Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 118 Hüküm no: 119 Orijinal metin no: [40a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vârissiz ölen Hüseyin Bey b. Nasuh’un bahçesinin beytülmâlce Dimitri v. Kosta’ya satılması Mahmiye-i İstanbul ve tevâbi‘inde vâki‘ hâssa sarrâclar beytülmâl emîni olan fahrü’l-akrân Mehmed Bey b. Osman meclis-i şer‘-i kavîmde, medîne-i hazret-i Ebî Eyyûb el-Ensârî müzâfâtından Hasköy mahallâtından Ahmed Çelebi mahallesi sâkinlerinden Dimitri v. Kosta nâm zimmî mahzarında ikrâr ve i‘tirâf edip, mahalle-i mezbûrede sâkin iken vefât edip vâris-i ma‘rûfu olmamağla, cümle terekesi mîrîye âid olan hâssa sarrâclardan Hüseyin Bey b. Nasuh nâm müteveffânın terekesinden mahalle-i mezbûrede vâki‘ hudûdunun bir tarafı Aynî Hâtun mülküne ve bir tarafı Ömer Bey mülküne ve bir tarafı Turşucu vakfı’na ve bir tarafı müteveffâ-yı mezbûr Hüseyin Bey vakfı’na müntehiye olup, bir tahtânî beyti ve bir su kuyusunu muhteviye zât-ı eşcâr-ı müsmire hadîka bey‘ için kirâren mecâlis[de] tâlibîn ve râgıbîne arz olunup, rağabât-ı nâs münkatı‘a oldukdan sonra mezbûr Dimitri’nin üzerinde on iki bin yüz akçede karâr etmeğin, hadîka-i merkūmeyi bi cümleti’t-tevâbi‘ ve’l-levâhık merkūm Dimitri’ye meblağ-ı mezbûr on iki bin yüz akçeye emânetim hasebiyle bey‘-i bâtt-ı sahîh-i şer‘î ile bey‘ edip, kabz-ı semen-i ma‘dûd ve teslîm-i mebî‘-i mahdûd eyledim. Min ba‘d hadîka-i merkūme mezbûr Dimitri’nin mülk-i sarfı olmuşdur dedikde, mukırr-ı merkūm Mehmed Bey’in ber vech-i meşrûh sudûr eden ikrârın merkūm Dimitri vicâhen ve şifâhen tasdîk ve tahkīk etmeğin, mâ-vaka‘a bi’t-taleb ketb ve tahrîr olunup yed-i tâlibe vaz‘ olundu. Tahrîren fî evâsıtı Şa‘bâni’l-mu‘azzam li sene selâse ve ışrîn ve elf. Şuhûdü’l-hâl: Mahmud b. Mehmed Sarrâc-ı hâssa, Mustafa Bey b. Hasan el-Cündî, Hüseyin Bey b. Pervâne Ser-bölük-i cebeciyân, Ömer b. Abdullah er-Râcil, Hüsrev Bey b. Abdullah el-Mütevellî, Kasım b. Ali el-Müezzin, Ferhad b. Abdullah en-Nakkāş, Piyâle Bey b. Abdullah bahçevân, Mehmed Bey b. Ali Kiremidçi, Ali Çelebi b. Memi er-Reis, İsmail Bey b. Uğurlu Sarrâc-ı hâssa, Mahmud Halîfe b. Hasan el-Müezzin, Hüseyin Bey b. Mehmed Sarrâc-ı hâssa, Ahmed Halîfe b. Cafer el-İmâm, Hüseyin Reis b. Veli, Müstedâm Bey b. Abdullah el-Cündî, Ahmed b. Abd[i] el-Müezzin, Mustafa Çelebi b. Kaya Sarrâc-ı hâssa, Bekir Çelebi b. Cafer er-Râcil ve gayruhüm mine’l-hâzırîn.