Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 130 Hüküm no: 133 Orijinal metin no: [45b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Çelebi b. Mehmed’in menzil davasının reddi Galata hâ[ri]cinde kasaba-i Tophâne mahallâtından Kuloğlu mahallesinden olup, bundan akdem fevt [olan] Cenâne bt. Abdullah nâm hâtunun zevci ve vârisi olan hâmilü’l-kitâb Hüseyin Bey b. İbrahim el-Cündî meclis-i şer‘-i hatîr[de], mahmiye-i mez[bûrda] bi’l-fi‘l beytülmâl-i âmme emîni olan Murad Ağa tarafından vekîl ve kāimmakām olup, nehc-i şer‘î ve tarîk-i mu‘teber-i mer‘î üzre vekâleti sâbite olan Ali Çelebi b. Mehmed nâm kimesneyi ihzâr ve üzerine da‘vâ edip, zevcem müteveffât-ı [46a] mezbûreden mahalle-i mezbûrede vâki‘ bir cânibi Ali Çavuş mülkü ve bir tarafı Ahmed Çelebi mülkü ve bir cânibi merhûme Cennet Hâtun vakfı ve tarafı tarîk-i âma ile mahdûd ve mümtâz olup bir bâb ahırı ve harâba hamamı ve cüneyneyi ve eşcâr-ı müsmire ve gayr-ı müsmireyi müştemil olan menzili, bi cümleti’l-hudûd ve kâffeti’l-hukūk hâl-i sıhhatinde dört bin akçeye iştirâ ve temlîk edip, semen-i mezbûru müteveffât-ı mezbûre zimmetimde olan karz-ı şer‘den dört bin akçe hakkı ile takās etmiş iken mezbûr Ali Çelebi beni tasarrufuma mâni‘ olur deyip takrîrini musaddık bin yirmi üçüncü senesi Ramazân-ı şerîfinin altıncı günü târihi ile müverraha ve Galata mahkemesinde nâibü’ş-şer‘ olan Hamza Efendi b. Ali nâm kimesne imzâ ve hatmi ile mu‘anven hüccet ibrâz edip mezbûr Ali Çelebi’den suâl olundukda, mazmûn-ı hüccet[i] inkâr etmeğin, gıbbe’l-inkâr ve’l-istişhâd hüccet-i mezbûre zeylinde esâmîsi mastûr olan udûl-i müslimînden Abdurrahman Efendi b. Yusuf ve Mehmed Bey b. Abdullah el-Cündî ve Ali Efendi b. ( ) nâm kimesneler meclis-i şer‘a li ecli’ş-şehâde hâzırûn olup, fi’l-hakīka mezbûr Hüseyin Bey zevcesi müteveffât-ı mezbûreden zikri sebk eden târihden hudûdu mezkûr olan menzili dört bin akçeye ve hâl-i hayâtında iştirâ ve kabûl ve kabz edip, semen-i mezbûr dört bin akçeyi müteveffât-ı mezbûrenin mezbûr Hüseyin Bey’de olan karz-ı şer‘îden dört bin akçe deyni ile takās eyledi, bu vech üzre mazmûn-ı hüccet[e] şâhidleriz, şehâdet dahi ederiz deyû edâ-i şehâdet ettiklerinde, gıbbe’t-ta‘dîl ve’t-tezkiyye şâhidân-ı mezbûrânın şehâdetleri hayyiz-i kabûlde vâki‘ olmağın, mezbûr Ali Çelebi mu‘ârazadan men‘ olunup menzil-i sâlifü’z-zikr mezbûr Hüseyin Bey yedinde ibkā olunup, mâ-vaka‘a gıbbe’t-taleb [ketb olundu]. [46b] Tahrîren fî evâsıtı şehri Şevvâli’l-mükerrem sene selâse ve ışrîn ve elf. Şuhûdü’l-hâl: İskender Bey b. Cârullah el-Müezzin, Musa Efendi b. Mahmud, Mehmed b. İbrahim, Mehmed b. Eyüb, Ali Bey b. ( ), Mehmed Bey b. Abdullah ve gayruhüm.