Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 131 Hüküm no: 134 Orijinal metin no: [46b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hannan bint-i Abdullah’ın hayattayken eşyasını kocası Hüseyin Bey ibn-i İbrahim’e hibe etmesi Mahmiye-i Galata hâricinde Tophane mahallâtından Koloğlu mahallesi sâkinelerinden olup bundan akdem fevt olan Hannan bint-i Abdullah nâm hâtûnun zevci ebnâ-i sipâhiyândan hâmilü’l-kitâb Hüseyin Bey ibn-i İbrahim mahfil-i kazâya mahmiye-i mezbûrede beytülmâl-i âmme emîni olan Şekercioğlu Murad Ağa’nın vekîli ve kāimmakāmı olup nehc-i şer‘î üzere vekâleti sâbite olan Ali Çelebi bin Mehmed nâm kimesneyi ihzâr ve üzerine da‘vâ edip müteveffât-ı mezbûre zevcem hâl-i sıhhatinde târih-i kitâbdan beş yıl mukaddem silk-i mülkünde muntazam bir kaliçe ve bir müsta‘mel yorgan ve dört kıt‘a yastık ve bir beledî döşek ve dört aded ayaklı sahan ve iki Türkî tepsi ve iki tencere ve bir hamam leğeni ve bir maşraba ve bir ayaklı sandık ve bir mor yeşil saçaklı ferace ve bir kırmızı zıbın ve bir müsta‘mel yeşil atlas-ı hâm ve bir müsta‘mel yorgan ve bir beyaz çarşaf bana hibe-i sahîha-i şer‘iyye ile hibe ve temlîk edip ben dahi eşyâ-i mevhûbe-i meşrûhayı meclis-i hibede kabûl [ve] kabz ve ittihâb eyledim, zikr olunan eşyâ mülk-i mevhûbum iken emîn-i müşârün-ileyh Murad Ağa’nın vekîli mezbûr Ali Çelebi kabz edip bana teslîmden imtinâ‘ eder, su’âl olunup bana alıverilmesin taleb ederim dedikde gıbbe’s-su’âl vekîl-i mezbûr Ali Çelebi bâlâda zikri sebk eden eşyâmı kabz ettiğini ikrâr ve müteveffât-ı mezbûre hibe-i sahîha-i tâm ile hibe ve temlîk ettiğini inkâr etmeğin mezbûr Hüseyin Bey’den sıdk-ı makāline beyyine taleb olundukda udûl-i müslimînden Mehmed Bey bin Abdullah ve Mustafa bin Abdulvehhab meclis-i şer‘[de] li ecli’ş-şehâde hâzırân olup fi’l-hakīka müteveffât-ı mezbûre hâl-i sıhhatinde bâlâda zikri sebk ve tahrîr olunan eşyâyı târih-i kitâbdan beş yıl mukaddem zevci mezbûr Hüseyin Bey’e bizim huzûrumuzda hibe-i sahîha ile hibe ve temlîk edip mezbûr Hüseyin dahi meclis-i hibede [47a] eşyâ-i mevhûbeyi kabûl ve ittihâb eyledi, hâlâ eşyâ-i sâbıku’z-zikr mülk-i mevhûbudur, bu husûsa şâhidleriz, şehâdet dahi ederiz dediklerinde gıbbe’t-ta‘dîl ve’t-tezkiyye hayyiz-i kabûlde vâki‘ olmağın mezbûr Ali Çelebi mu‘ârazadan men‘ olunup mâ-vaka‘a gıbbe’t-taleb ketb olundu. Tahrîren fî evâsıtı şehri Şevval sene 1023. Şuhûdü’l-hâl: es-Sâbıkūn.