Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 133 Hüküm no: 137 Orijinal metin no: [47b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vârisi olmayan Çengi Yasemin bt. Abdullah’ın evinin beytülmâlce Âbide Hatun bt. Abdullah’a satıldığı Havâss-ı Kostantıniyye’de vâki‘ olup Hazret-i Ebî Eyyûb Ensârî -aleyhi rahmetü’l-Bârî- evkāfı’na bi’l-fi‘l mütevellî olan fahrü’l-a‘yân Hüseyin Bey b. Abd[ullah] ve havâss-ı mezbûrede bi’l-fi‘l beytülmâl-i âmme emîni olan fahrü’l-akrân Mustafa Çavuş b. el-Hâc Nasuh tarafından vekîl olup, hasm-ı şer‘-i câhid mahzarında vekâleti nehc-i şer‘î üzre sâbite olan Yusuf Bey b. Abdullah nâ[m] cündî mahfil-i şer‘-i şerîfde, işbu hâmiletü’l-kitâb Âbide Hâtun bt. Abdullah mahzarında asâleten ve vekâleten ikrâr ve takrîr-i kelâm eyleyip, havâss-ı mezbûre mahallâtından Canperver mahallesinde sâkine iken [48a] bundan akdem fevt olan Çengi Yasemin bt. Abdullah nâm müteveffânın zâhirde vâris-i ma‘rûfu olmamağın, mahalle-i mezbûrede bir tarafı Hüsrev b. Abdullah mülkü ve bir tarafı Ahmed b. Abdullah mülkü ve bir tarafı Mahmud b. Abdullah mülkü ve bir tarafı tarîk-i hâs ile mahdûd olup bir beyt-i ulvî ve bir tahta-bendi ve kenîfi müştemil olan mülk menzilinin nısfı beytülmâle ve nısf-ı âharı cânib-i vakfa âid olmağın, mezbûru ba‘de’l-arz ale’t-tâlibîn mirâr[en] ve gıbbe inkıtâ‘i rağbeti’r-râgıbîn kirâren mezbûre Âbide Hâtun üzerinde beş bin beş yüz nakd-i râyic fi’l-vakt akçede karâr edip ziyâde ile âhar tâlib ve râgıb olmamağın, menzil-i mezbûru asâleten ve vekâletim hasebiyle mezbûre Âbide Hâtun’a meblağ-ı mezbûr beş bin beş yüz akçeye bey‘-i bâtt-ı sahîh-i şer‘î ile bey‘ edip kabz-ı semen ve teslîm-i mebî‘ eyledik. Ba‘de’l-yevm menzil-i mezbûr mezbûre Âbide Hâtun’un mülk-i müşterâsıdır, keyfe mâ teşâ’ mutasarrıf olsun dediklerinde, mukırrân-ı mezbûrânı ikrâr-ı meşrûhaları üzre el-mukarru lehâ’l-mezbûre Âbide dahi vicâhen tasdîk edicek, mâ-vaka‘a ketb olundu. Hurrire fi’l-yevmi’s-sâmin aşer min Şevvâl li sene selâse ve ışrîn ve elf. Şuhûdü’l-hâl: Hasan Efendi el-İmâm, Mustafa b. Abdullah, İsa b. Abdullah, Hüsrev b. Abdullah, Ahmed b. Abdullah, el-Hâc Durgud b. Durak, Mehmed b. Ali, Receb b. Ali, Musli Çelebi b. ( ), el-Muhzırûn.