Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 134 Hüküm no: 138 Orijinal metin no: [48b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Ali’nin vârisleri olan çocukları Hüseyin, Halil ve Râbia ile hanımı İsmihan Hatun bt. Abdülgaffar’ın sulh oldukları Mahmiye-i Galata hâricinde Tophâne mahallâtından Müeyyedzâde mahallesi sâkinlerinden olup, bundan akdem fevt olan merhûm Mustafa b. Ali nâm kimesnenin verâseti, kebîr oğulları Hüseyin ve Halil’e ve kebîre kızı Râbia’ya ve zevce-i metrûkesi İsmihan Hâtun bt. Abdülgaffâr’a münhasıra oldukdan sonra mezbûre İsmihan mahfil-i kazâda merkūmân Hüseyin ve Halil ve mezbûre Râbia mahzarında ikrâr ve i‘tirâf edip, müteveffâ-yı mezbûrun muhallefâtı otuz iki sehim olup sümünü olan dört sehmi bana, mâ‘adâsı olan yirmi sekiz sehmi mezbûrân Hüseyin ve Halil ve mezbûre Râbia’ya âid olmağın, zikr olunan verese yedimde olan Nevcivan nâm câriye müteveffâ-yı mezbûr babamızın akçesiyle alınmış mülküdür deyû ondan hisse-i ma‘lûmelerini da‘vâ ve taleb ettiklerinde, câriye-i mezbûreyi ve sâir muhallefâtından olan menkūlât ve akārâtı alâ sebîli’t-tehârüci’ş-şer‘î dört bin akçeye verese-i mezbûrîn benim ile sulh olup, ben dahi meblağ-ı mezbûr dört bin akçeyi zikr olunan vereseye edâ ve teslîm eyledim, onlar dahi kabûl ve kabz eylediler, müteveffâ-yı mezbûrun metrûkâtına ve mehrime müte‘allik da‘vâ ve husûmetden merkūmîn Hüseyin ve Halil ve Râbia’nın zimmetlerini ibrâ-i âm ile ibrâ ve ıskāt eyledim. Min ba‘d muhallefât-ı mezkûre ve mehrime müte‘allik da‘vâ ve talebim yoktur dedikde, mukırre-i merkūmeyi cemî‘ kelimât-ı meşrûhasında el-mukarru lehümü’l-merkūmîn dahi vicâhen tahkīk edicek, mâ-vaka‘a gıbbe’t-taleb sebt olundu. Tahrîren fî evâili şehri Şevvâli’l-mükerrem li sene selâse ve ışrîn ve elf. Şuhûdü’l-hâl: Mustafa Beşe b. Mehmed er-Râcil, Hüseyin b. Ali, Yusuf b. Ali, Ramazan Reis b. Himmet, Mehmed b. Hüseyin el-Müezzin, Mehmed b. İshak, Rıdvan b. Abdullah, Hüseyin b. Behram, Mustafa ve İbrahim el-Muhzır ve gayruhüm.