Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 656 Hüküm no: 840 Orijinal metin no: [101a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ekmekçi Mardiros v. Kirakos’un, demirci Kazar v. Graham’dan alacaklı olduğu Ekmekçi tâifesinden olup mahmiye-i İstanbul’da Langa kurbunda sâkin Mardiros v. Kirakos nâm zimmî meclis-i şer‘-i şerîfde demirci tâifesinden Kazar v. Graham nâm zimmî muvâcehesinde üzerine da‘vâ ve takrîr-i kelâm edip her bir esedî guruş yüzer akçeye râyic olan akçe ile cihet-i karzdan mezbûr Kazar zimmetinde iki bin altı yüz akçe hakkım vardır suâl olunup alıverilmek matlûbumdur dedikde, gıbbe’s-suâl mezbûr Kazar cevâbında müdde‘î-i mezbûra mezkûrü’n-na‘t akçe ile ancak iki bin dört yüz otuz akçe deynim olup meblağ-ı mezbûrun iki yüz elli akçesini kendiye hâlâ edâ ve teslîm edip zimmetimde cihet-i mezbûrdan ancak iki bin yüz seksen akçe hakkı bâkī kalmışdır deyû ziyâde yüz yetmiş akçeyi inkâr edicek müdde‘î-i mezbûrdan ziyâde-i mezbûre için beyyine taleb olundukda ityân-ı beyyine için istimhâl etmeğin mehl-i şer‘î ile imhâl olunup ikrârı mertebesi olan meblağ-ı mezbûr iki bin yüz seksen akçeyi müdde‘î-i mezbûra edâ ve teslîme merkūm Kazara ba‘de’t-tenbîh mâ hüve’l-vâki‘ bi’t-taleb ketb olundu. Fi’l-yevmi’s-sâmin [min] Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Mehmed Çelebi b. Abdullah, Baba Resul [b.] Rıdvan, Mehmed Bey b. Ramazan, İbrahim b. Ahmed.