Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 656 Hüküm no: 841 Orijinal metin no: [101a-6] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Musli b. Hacı Mahmud’un, Mehmed b. Memi’den alacaklı olduğu Mahmiye-i İstanbul’da Hocapaşa kurbunda Karekî mahallesinde sâkin Hacı Musli b. Hacı Mahmud nâm kimesne mahfil-i kazâda Mehmed b. Memi nâm kimesne mahzarında üzerine da‘vâ ve takrîr-i kelâm edip mezbûr Mehmed zimmetinde cihet-i karz-ı şer‘îden dört bin akçe hakkım olup hattâ bundan akdem huzûr-ı müslimînde ikrâr dahi etmişken hâlâ taleb eylediğimde vermekde imtinâ‘ eder, suâl olunup alıverilmek murâdımdır dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda udûl-i müslimînden olup mahalle-i mezbûr sükkânından Mehmed Efendi b. Süleyman ve Bayram Çelebi b. Resul nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka mezbûr Mehmed müdde‘î-i mezbûra cihet-i mezbûreden dört bin akçe deyni olduğunu bundan akdem bizim huzûrumuzda ikrâr ve bizi işhâd etmişidi biz bu husûsa bu vech üzre [101b] şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle olmağın mûcebince müdde‘î-i mezbûr el-Hâc Musli’ye meblağ-ı mezbûr dört bin akçeyi tamâmen edâ ve teslîme mezbûr Mehmed’e tenbîh olunup mâ vaka‘a bi’t-taleb ketb olundu. Fi’l-yevmi’l-âşir min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Gazanfer Bey b. Tevekkül, İbrahim Çelebi b. Mehmed, Baba Resul [b.] Rıdvan, Mehmed Beşe b. Ramazan.