Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 137 Hüküm no: 142 Orijinal metin no: [49b-2, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe ve Fâtıma adlı küçüklere babalarından intikal eden evin babalarının borcu için müzâyede sûretiyle satıldığı Babaları bundan akdem vefât eden Âişe ve Fâtıma bintey İbrahim Efendi nâm sagīreyne kıbel-i şer‘den mansûb vasî olan fahrü’l-akrân Mehmed Efendi b. Halil, âti’z-zikr menzili vesâyet-i mahkiyesi hasebiyle hâmilü hâze’l-kitâb Mehmed Bey b. Abdullah’a bey‘-i bâtt-ı sahîh ile bey‘ ettiğini ikrâr ve i‘tirâf etti. Müşterî-i mezbûr da sagīreyn-i mezbûreyne irs-i şer‘le babalarının muhallefâtından intikāl eden, mahmiye-i Galata müzâfâtından Kasımpaşa mahallâtından el-Hâc Hüsrev mahallesinde kâin bulunan, bir tarafdan sadrü’l-ulemâ ve’l-mevâlî sâhibü’l-mekârim ve’l-me‘âlî Es‘âd Efendi bahçesi, diğer tarafdan Mehmed ve Hüseyin mülkleri, iki tarafdan da tarîk-ı âm ile mahdûd olan, fevkānî ve tahtânî birer menzili, üç kuyuyu, helâyı, eşcâr-ı müsmire ve gayr-ı müsmireyi hâvî bulunan cemî‘-i menzili cümle hudûdu ve tarîki ve kâffe-i hukūku ve merâfıkı ile râyicü’l-vakt dört bin akçe-i Osmânî semen-i mu‘ayyen-i makbûzla iştirâ etti. Vâki‘ ikrâr müşterî-i mezkûr tarafından vicâhen ve şifâhen tasdîk edildi. İşbu mübâya‘a, müteveffâ-yı mezbûrun borcu için menzil-i merkūmun sûk-i sultânîde müzâyedeye arz edilip semen-i mezkûrda müşterî-i mesfûrda karâr kılmasından ve ehl-i vukūfun semen-i mezkûrun vukū‘-i bey‘ gününde semen-i misli olduğunu haber vermelerinden sonra vâki‘ oldu. Cerâ zâlike fî 1023. Şuhûdü’l-hâl: Mehmed b. Ahmed el-İmâm, İbrahim b. Süleyman, Mehmed b. Abdülcelil, Mehmed b. Mustafa, Mustafa b. Mehmed.