Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 141 Hüküm no: 149 Orijinal metin no: [52a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Memi Paşa b. Abdülmennân’ın kölesi Behram b. Abdullah’ın azat olduğu Mahmiye-i Galata müzâfâtından kasaba-i Kasımpaşa’da sâkin olup bundan akdem Donanma-yı Hümâyûn seferinde Avarin Limanı nâm mevzi‘de şehîd olup, vâsıl-ı rahmet-i Rahmân olan Memi Paşa b. Abdülmennân nâm kimesnenin verâseti zevce-i metrûkesi Fâtıma Hâtun bt. Sinan Bey’e ve sulbiye kızı Meryem Hâtun’a ve sulbî kebîr oğlu umdetü’l-a‘yân Ali Bey’e münhasıra oldukdan sonra mezbûr Ali Bey asâleten ve mezbûre Fâtıma’yı ma‘rifet-i şer‘iyye ile ârifeyn olan Mehmed Ağa b. Süleyman ve el-Hâc Süleyman Bey b. Abdülmennân şehâdetleriyle vekâleti sâbite olan fahrü’l-eimme Derviş Efendi b. Halil vekâleten ve mezbûre Meryem Hâtun’un zevci olup, kezâlik i‘tâk-ı âti’z-zikri ikrâra vekîl olup Mehmed Ağa b. Süleyman ve Ali Ağa b. Süleyman şehâdetleriyle vekâleti sâbite olan fahrü’l-akrân Piyâle Kapudân b. Abdurrahman vekâleten meclis-i şer‘-i celîlü’ş-şânda her biri ikrâr ve takrîr-i kelâm edip, müteveffâ-yı müşârün-ileyh bundan akdem tasarrufât-ı kavliyyesi nâfize ve teberru‘ât-ı fi‘liyyesi câize [ve] mu‘tebere olduğu hâlde silk-i mülk-i sahîhinde münzam olup, müslim olan kullarımın cümlesi malımdan âzâd olsun deyû ikrâr etmişdi. El-hâletü hâzihî müteveffâ-yı müşârün-ileyh Memi Paşa’nın abîdinden hâmilü’l-kitâb orta boylu açık kaşlı gök elâ gözlü sarışın Çerkeziyyü’l-asl Behram b. Abdullah nâm müslim-i emred dahi vech-i meşrûh üzre müteveffâ-yı mezbûrun malından âzâd olup, ıtk-ı merkūm dahi bizim makbûlümüzdür dediklerinde, mâ-vaka‘a gıbbe’t-taleb ketb olundu. Tahrîren fî evâili Zilka‘de li sene selâse ve ışrîn ve elf. Şuhûdü’l-hâl: Mehmed Ağa b. Abdullah, Mehmed Çavuş b. ( ) Dergâh-ı âlî, Hüseyin Hoca b. Abdullah, Ahmed Çavuş b. ( ), Mehmed b. Receb, İbrahim b. Abdullah, Mustafa b. ( ) el-Muhzır, İbrahim b. ( ) el-Muhzır ve gayruhüm.