Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 140 Hüküm no: 148 Orijinal metin no: [51b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Memi Paşa b. Abdülmennân’ın kölesi Receb b. Abdullah’ın azat olduğu Mahmiye-i Galata müzâfâtından kasaba-i Kasımpaşa’da sâkin olup, bundan akdem Donanma-yı Hümâyûn seferinde Avarin nâm mevzi‘de şehîd olup, vâsıl-ı rahmet-i Rahmân olan Memi Paşa b. Abdülmennân nâm müteveffâ[nın] verâseti zevce-i metrûkesi fahrü’l-muhadderât Fâtıma bt. Sinan Bey nâm hâtuna ve sulbiye kebîre kızı zahrü’l-muvakkarât Meryem Hâtun’a ve sulbî kebîr oğlu umdetü’l-a‘yân Ali Bey’e münhasıra oldukdan sonra mezbûr Ali Bey asâleten ve mezbûre Fâtıma Hâtun tarafından i‘tâk-ı câ’i’l-beyânı ikrâra vekîl olup, hasm-ı şer‘-i câhid mahzarında mezbûre Fâtıma’yı ma‘rifet-i şer‘iyye ile ârifeyn olan Mehmed Ağa b. Süleyman ve el-Hâc Süleyman Bey b. Abdülmennân şehâdetleriyle vekâleti sâbite olan fahrü’l-eimme Derviş Efendi b. Halil vekâleten ve mezbûre Meryem Hâtun’un zevci olup kezâlik i‘tâk-ı âti’z-zikri ikrâra vekîl olup, Mehmed Ağa b. Süleyman ve Ali Ağa b. Süleyman şehâdetleriyle vekâleti sâbite olan fahrü’l-akrân Piyâle Kapudân b. Abdürrahim vekâleten meclis-i şer‘-i şerîfde her biri ikrâr ve takrîr-i kelâm edip, müteveffâ-yı müşârün-ileyh bundan akdem tasarrufât-ı kavliyyesi nâfize ve teberru‘ât-ı fi‘liyyesi câize ve mu‘tebere olduğu hâlde silk-i mülkünde olup müslim olan kullarımın cümlesi malımdan âzâd olsun deyû ikrâr ve i‘tirâf etmişdi. El-hâletü hâzihî müteveffâ-yı müşârün-ileyh Memi Paşa’nın abîdinden hâmilü’l-kitâb orta boylu gök elâ gözlü açık kaşlı sağ elinde üç parmağında eser-i cerh olan Eflakiyyü’l-asl Receb b. Abdullah nâm müslim-i emred dahi vech-i meşrûh üzre müteveffâ-yı mezbûrun malından âzâd olup, ıtk-ı merkūm dahi bizimde makbûlümüzdür dediklerinde, mâ-vaka‘a bi’t-taleb ketb olundu. Hurrire fi’l-yevmi’s-sâdis min Zilka‘deti’ş-şerîfe li sene 1023. Şuhûdü’l-hâl: Mehmed Ağa b. Abdullah, Mehmed Çavuş [b.] ( ) Dergâh-ı âlî, Hüseyin Hoca b. Abdullah, Ahmed Çavuş [b.] ( ) Dergâh-ı âlî, Mehmed b. Receb, İbrahim Beşe b. [Abdullah], el-Muhzırûn ve gayruhüm.