Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 145 Hüküm no: 156 Orijinal metin no: [54a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ömer Beşe b. Abdülvehhâb’ın ölen Mustafa Beşe b. Abdullah’tan alacaklı olması Dergâh-ı âlî yeniçerilerinden hâmilü’l-kitâb Ömer Beşe b. Abdülvehhâb nâm râcil mahfil-i kazâda, mahmiye-i Galata müzâfâtından İstinye nâm kasabadan olup bundan akdem fevt olan Mustafa Beşe b. Abdullah nâm râcilin zevce-i metrûkesi olup ve sagīre kızı Âişe’ye kıbel-i şer‘den vasî nasb olunan Mümine bt. Murad nâm hâtun tarafından husûs-ı âti’z-zikre vekîl olup, vekâleti mezbûre Mümine’yi ma‘rifet-i şer‘iyye ile ârifeyn olan Osman Efendi b. el-Hâc Pîrî ve diğer Osman Beşe b. Abdullah şehâdetleriyle şer‘an vekâleti sâbite olan Mustafa b. Abdullah nâm kimesneyi ihzâr ve üzerine da‘vâ edip, müteveffâ-yı mezbûr Mustafa Beşe hâl-i sıhhatinde bundan akdem benden bi tarîki’l-karzi’ş-şer‘î on üç bin nakid fıddî-i Osmânî akçe alıp kabz edip, müteveffâ-yı mezbûr hattâ meblağ-ı mezbûr lâzımü’l-edâ deynimdir deyû hâl-i sıhhatinde beyne’l-işhâd ikrâr dahi etmişdir, suâl olunup meblağ-ı mezbûrun şer‘an alıverilmesini taleb ederim dedikde, gıbbe’s-suâl vekîl-i mezbûr inkâr ile cevâb vermeğin, müdde‘î-i mezbûrdan sıdk-ı makāline beyyine taleb olundukda, udûl-i müslimînden Mehmed Beşe b. Abdullah ve diğer Mehmed Beşe b. Abdülvehhâb nâm kimesneler meclis-i şer‘a li ecli’ş-şehâde hâzırân olup, fi’l-vâki‘ müteveffâ-yı mezbûr hâl-i sıhhatinde müdde‘î-i mûmâ-ileyh Ömer Beşe yedinden bi tarîki’l-karzi’ş-şer‘î on üç bin akçe alıp kabz edip, el-ân zimmetimde lâzımü’l-edâ deynimdir deyû bizim mahzarımızda tav‘an i‘tirâf eyledi, bu husûsa şâhidleriz, şehâdet dahi ederiz deyû edâ-i şehâdet-i şer‘iyye ettiklerinde, ba‘de’t-ta‘dîl şehâdetleri makbûle olmağın, gıbbe’l-istihlâf, mâ-vaka‘a gıbbe’t-taleb sebt olundu. Şuhûdü’l-hâl: Osman b. el-Hâc Pîrî, İbrahim Halîfe b. Mustafa el-İmâm, Mustafa Halîfe b. Hasan el-İmâm, Hasan b. Abdullah, Mehmed Bey b. Abdullah ve gayruhüm.