Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 145 Hüküm no: 155 Orijinal metin no: [53b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ömer Beşe b. Abdullah’ın ölen Mustafa Beşe b. Abdullah’tan alacaklı olması Hâmilü’l-kitâb sefîne reislerinden Ömer Beşe b. Abdullah mahfil-i kazâda, mahmiye-i Galata tevâbi‘inden kasaba-i İstinye mahallâtından Kürkçübaşı mahallesi sâkinlerinden olup, bundan akdem nefs-i Azak’da fevt olan Mustafa Beşe b. Abdullah nâm râcilin zevce-i metrûkesi olup sagīre kızı Âişe’ye kıbel-i şer‘-i şerîfden vasî nasb olunan Mümine bt. Murad hâtun tarafından husûs-ı âti’z-zikre vekîl olup, hasm-ı şer‘-i câhid mahzarında mezbûre Mümine’yi ma‘rifet-i şer‘iyye ile ârifeyn olan Osman Bey b. Abdullah ve diğer Osman Efendi b. el-Hâc Pîrî şehâdetleriyle vekâleti sâbite olan oğlu Mustafa b. Abdullah mahzarında takrîr-i da‘vâ edip, müteveffâ-yı mezbûr Mustafa Beşe zimmetinde karz-ı şer‘îden on üç bin akçe hakkı vardır, şer‘le suâl olunup muhallefâtından alıverilmesin taleb ederim dedikde, gıbbe’s-suâl vekîl-i mezbûr inkârıyla cevâb vermeğin, müdde‘î-i mezbûrdan da‘vâsına muvâfık beyyine taleb olundukda, udûl-i müslimînden Mehmed Beşe b. Abdullah ve diğer Mehmed Beşe b. Abdülmennân nâm kimesneler meclis-i şer‘a li ecli’ş-şehâde hâzırân olup, fi’l-vâki‘ müteveffâ-yı mezbûr Mustafa Beşe zimmetinde mezbûr Ömer Beşe’nin karz-ı şer‘îden on üç bin akçe [54a] hakkı vardır deyû husûsa şâhidleriz, şehâdet dahi ederiz dediklerinde, şâhidân-ı mezbûrânın şehâdetleri hayyiz-i kabûlde vâki‘ olup, ba‘dehû mezbûr Ömer’den gıbbe’l-istihlâf meblağ-ı mezbûru taraf-ı şer‘iyyeden bir tarîkle kabz ve malından ahz etmediğine half billâhi’l-azîm etmeğin, mâ-vaka‘a ketb olundu. Hurrire fî evâili Zilka‘deti’ş-şerîfe li sene 1023. Şuhûdü’l-hâl: Osman Bey b. el-Hâc Pîrî, Osman Efendi b. Abdullah, İbrahim Halîfe b. Mustafa, Mustafa Halîfe b. Hasan el-İmâm.