Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 60 Hüküm no: 17 Orijinal metin no: [4a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât etmiş olan Ali b. Abdülkerim’in vârislerinden hanımı Atiye’de küçük oğlu Receb’in vasisinin alacağı kalmadığı Vilâyet-i Anadolu’da Yedidivan kazâsına tâbi‘ Ayazma nâm karye ahâlîsinden olup bundan akdem müteveffâ olan Ali b. Abdülkerim nâm kimesnenin mîrâsı zevce-i metrûkesi Atiye bt. Abdullah nâm hatun ve sulbî oğulları Receb ve Ali nâm sagīrlere münhasıra olup kable’l-kısmet mezbûr Ali dahi müteveffâ olup verâseti vâlidesi mezbûre Atiye ile li-ebeveyn karındaşı mezbûr Receb’e münhasıra olduğu şer‘an mütehakkık olup bi-tarîkı’l-münâsaha mes’eleleri kırk sekiz sehmden olup on üç sehmi mezbûre Atiye’ye ve otuz beş sehmi sagīr-i mezbûr Receb’e isâbet eylediği mübeyyen oldukdan sonra mezbûre Atiye meclis-i şer‘-i şerîfde sagīr-i mezbûr Receb’in vasiyy-i şer‘îsi olan bâ‘isü’l-kitâb Hüseyin Bey b. Sinan nâm kimesne muvâcehesinde ikrâr-ı tâm ve takrîr-i kelâm edip zevcim ve mûrisim müteveffâ-i mezbûrun vasiyy-i mezbûr yedinde mazbût olan altı bin akçe terekesinden bi-tarîkı’l-münâsaha yedi yüz elli akçe ve oğlum müteveffâ-i mezbûrun terekesinden sekiz yüz yetmiş beş akçe ki cem‘an altı yüz yirmi beş akçe vech-i muharrer üzere hisse-i şer‘iyyem olmağla vasiyy-i mezbûr yedinden bi’t-tamam ve’l-kemâl ahz u kabz edip meblağ-ı mezbûrdan bir akçe ve bir habbe bâkī kalmadı, ba‘de’l-yevm husûs-ı mezbûra müte‘allika da‘vâ sudûr ederse lede’l-hükkâm istimâ‘ olunmasın dedikde mâ-vaka‘a kayd şüd. Fi’l-yevmi’s-sâmin aşer min-Recebi’l-ferd li-sene selâse ve sittin ve elf. Şuhûdü’l-hâl: Mehmed Beşe b. Eymür, Bektaş Beşe b. Ali, Murad Beşe b. Rûşen, el-Hâc Ahmed el-müezzin, Mehmed Beşe Çukadâr.