Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 59 Hüküm no: 16 Orijinal metin no: [4a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vâlide Sultan’ın Alasonya haslarının mültezimi olan Mehmed’in iltizamdan bir miktar borcu kaldığı Husûs-ı âti’l-beyânın mahallinde tahrîri iltimâs olunmağın küttâb-ı mahkemeden fahrü’l-kuzât es-Seyyid Mehmed Efendi irsâl olunup ol dahi zeyl-i kitâbda mastûrü’l-esâmî olan Müslimîn ile afîfetü’z-zât melekiyyetü’s-sıfât fahrü’l-muhadderât Vâlide Sultan -dâmet ismetuhâ- hazretlerinin kethüdâları ve taraf-ı şerîflerinden vekîl-i şer‘îleri olan fahrü’l-emâsil ve’l-akrân el-Hâc Mehmed Ağa b. Abdülmennan nâm kimesnenin mahmiye-i İstanbul’da Kepenekçi Sinan Mahallesi’nde sâkin olduğu menziline varılıp akd-i meclis-i şer‘ olundukda, merkūm el-Hâc Mehmed Ağa meclis-i mezbûrda diğer Mehmed b. Abdüllatif nâm kimesne muvâcehesinde bi’l-vekâle üzerine da‘vâ edip müvekkile-i mûmâ-ileyhâ hazretlerinin hâslarından vilâyet-i Rumeli’de Alasonya kazâsı hâssını bin altmış iki senesine mahsûb olmak üzere mezbûr Mehmed Ağa on üç yük elli bin akçeye deruhde olunup ol dahi iltizâm ve kabûl eyledikden sonra meblağ-ı mezbûrdan bir def‘a on bir yük on iki bin yedi yüz akçe kabz edip ve bir def‘a bâkīsini getirip el-Hâc Halil Ağa yediyle kırk bin akçe ve bir def‘a on bir bin beş yüz akçe ki cem‘an on bir yük almış dört bin iki yüz elli akçe ahz u kabz edip bâkī yedinde yüz seksen beş bin yedi yüz elli kalmışdır, suâl olunup takrîri tahrîr olunmak matlûbumdur dedikde, gıbbe’s-suâl mezbûr diğer Mehmed Ağa cevâbında fi’l-hakīka mûmâ-ileyhâ hazretlerinin hâslarından Alasonya kazâsı hâssını on üç yük elli bin akçeye bin altmış iki senesine mahsûb olmak üzere deruhde olunup ben dahi iltizâm ve kabûl eyledikden sonra on bir yük on iki bin yedi yüz akçesini vekîl-i mezbûr Mehmed Ağa’ya def‘ ve teslîm ba‘dehû kâtibim getirip el-Hâc Halil Ağa yediyle kırk bin akçe ve bir def‘a on bir [bin] beş yüz akçe ki cem‘an vekîl-i mezbûr Mehmed Ağa’ya on bir yük altmış dört bin iki yüz elli akçe def‘ ve teslîm edip ol dahi kabûl edip ancak yedimde yüz seksen beş bin yedi yüz akçe deynim kalmışdır deyü ikrâr u i‘tirâf eyledikde vâki‘ hâli mevlânâ-yı mezbûr mahallinde tahrîr ve meclis-i şer‘a gelip alâ-vukū‘ihî inhâ ve takrîr eyledikde mâ-vaka‘a kayd şüd. Hurrire fi’l-yevmi’t-tâsi‘ aşer min-Recebi’l-ferd li-sene selâse ve sittin ve elf. Şuhûdü’l-hâl: Davud Ağa b. Abdülmennan, Hızır Ağa b. Derviş, Sefer Ağa b. Abdülmennan, Abdurrahman Efendi b. Mehmed, İbrahim Çelebi b. Davud.