Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 150 Hüküm no: 160 Orijinal metin no: [56a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. Behram’ın terekesinden olan evin diğer vârislerin rızasıyla kızı Havva’ya satıldığı Mahmiye-i Galata hâricinde kasaba-i Tophâne mahallâtından Cihangir mahallesi sâkinelerinden bundan akdem fevt [olan] Âişe bt. Behram nâm müteveffâtın verâseti, li ebeveyn kız karındaşı sagīre Havva’ya ve li eb karındaşı sagīr Ali’ye ve vâlidesi Fedâi nâm hâtuna münhasıra olup, müteveffât-ı mezbûrenin muhallefâtından mahalle-i mezbûrede vâki‘ bir tarafı Hasan Çelebi mülkü ve bir tarafı Mehmed b. Boz Ali mülkü ve bir tarafı sagīr-i mezbûr Ali mülkü ile mahdûd olup, bir bâb beyt-i ulvîyi ve sofa ve kenîfi ve cüneyneyi müştemil olan menzilin altında olan bir bâb ev sagīre-i mezbûre[ye] babasından bi ciheti’l-irsi’ş-şer‘î intikāl edip, menzil-i mezbûrun beynlerinde taksîmi mümkin olmayıp, sagīre-i mezbûre üzerine yazılmasını vâlidesi Fedâi Hâtun ve sagīrân-ı mezbûrânın tesviye-i umûruna vasiyy-i muhtâr olan Mehmed Beşe nâm râcil vech ve münâsib görmeğin, menzil-i mezbûr ba‘de’l-arz ale’t-tâlibîn on bin akçede karâr edip müteveffât-ı mezbûreden bi ciheti’l-irs intikāl eden meblağdan on bin akçesi mukābelesinde mezbûre sagīre üzerine ta‘yîn olunup, cânib-i şer‘den dahi bu hurûf vasiyy-i mezbûr talebiyle kayd olundu. Tahrîren fî evâili Zilka‘de li sene selâse ve ışrîn ve elf. Şuhûdü’l-hâl: Veli b. Bâli, Mustafa b. Şaban, Musa Halîfe el-İmâm, Hasan Çelebi b. ( ) Sarrâc-ı sultânî, İbrahim Çavuş dergâh-ı âlî ve gayruhüm.