Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 163 Hüküm no: 178 Orijinal metin no: [62b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ramazan Bey b. Ali’nin hayattayken câriyesi Üftâde’yi kızı Fâtıma’ya hibe etmiş olduğu Mahmiye-i Galata hâricinde Müeyyedzâde mahallesi sâkinlerinden olup, bundan akdem fevt olan Ramazan Bey b. Ali nâm kimesnenin sulbiye sagīre kızı Fâtıma’ya kıbel-i şer‘den vasî nasb olunan fahrü’l-a‘yân Ali Ağa b. Süleyman mahfil-i kazâda, müteveffâ-yı mezbûrun kebîr oğlu Mustafa Çelebi mahzarında bi’l-vesâye takrîr-i da‘vâ edip, müteveffâ-yı mezbûr Ramazan Bey hâl-i hayâtında ve kemâl-i sıhhatinde kızı sagīre-i mezbûre Fâtıma’ya işbu hâzıre bi’l-meclis olan orta boylu, açık kaşlı, gök elâ gözlü, sarışın Rûsiyyetü’l-asl Üftâde nâm câriye-i memlûkesini hibe-i sahîha-i şer‘iyye ile hibe ve temlîk edip, yine müteveffâ-yı mezbûr velâyeti hasebiyle sagīre-i mezbûre Fâtıma için kendi kabz etmiş iken, hâlâ mezbûr Mustafa Çelebi câriye-i mezbûre beyne’l-verese taksîm olunmasın taleb eder, suâl olunup men‘ olunmasın taleb ederim dedikde, gıbbe’s-suâl mezbûr Mustafa Çelebi inkârıyla cevâb vermeğin, vasiyy-i müşârün-ileyh[den] cevâbına muvâfık beyyine taleb olundukda, udûl-i müslimînden Hacı Sinan b. Abdullah ve Ahmed Çelebi b. Ali ve Hasan Çelebi b. İbrahim nâm kimesneler meclis-i şer‘a li ecli’ş-şehâde hâzırûn olup, fi’l-hakīka müteveffâ-yı mezbûr Ramazan Bey hâl-i sıhhatinde câriye-i mezbûreyi sagīre-i mezbûre Fâtıma için bizim huzûrumuzda hibe-i sahîha-i şer‘iyye ile hibe ve temlîk edip, yine velâyeten kendisi sagīre-i mezbûre Fâtıma için kabz eyledi, bu husûsa şâhidleriz ve şehâdet dahi ederiz dediklerinde, şehâdetleri hayyiz-i kabûlde vâki‘ oldukdan sonra mûcebi ile hükm olunup, mâ-vaka‘a gıbbe’t-taleb kayd olundu. Hurrire fi’l-yevmi’s-sânî min Zilhicce li sene selâse ve ışrîn ve elf. Şuhûdü’l-hâl: Fahrü’l-a‘yân Mehmed Ağa b. Süleyman, Hacı Behram Bey b. Abdullah, İbrahim Çelebi b. ( ) el-Emîn, Ali b. Yusuf, Osman b. Kurd, Mustafa b. ( ) el-Muhzır, İbrahim b. ( ) el-Muhzır ve gayruhüm.