Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 163 Hüküm no: 177 Orijinal metin no: [62a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fedâi Hatun bt. Abdullah’ın Mehmed Bey b. Ali’den miras hissesini aldığı Mahmiye-i Galata hâricinde Tophâne mahallâtından Cihangir mahallesinden olup, bundan akdem fevt [olan] Âişe bt. Behram’ın vâlidesi Fedâi Hâtun bt. Abdullah nâm hâtun mahfil-i kazâda, müteveffâ-yı mezbûrenin li ebeveyn kız karındaşı Havva nâm sagīrenin tesviye-i umûruna vasiyy-i muhtâr olan Mehmed Bey b. Ali muvâcehesinde ikrâr ve i‘tirâf edip, sadriye kızı müteveffât-ı mezbûreden irs-i şer‘î ile bana intikāl eden sekiz bin sekiz yüz otuz dört akçe hisse-i şer‘iyyemi vasiyy-i mezbûr Mehmed Bey yedinden bi’t-tamâm ve’l-kemâl alıp kabz edip, min ba‘d bir akçe ve bir habbe hakkım bâkī kalmadı dedikde, mukırre-i merkūmeyi cemî‘ kelimât-ı meşrûhasında el-mukarru lehü’l-merkūm dahi bi’l-muvâcehe tasdîk ve tahkīk edicek, mâ-vaka‘a gıbbe’t-taleb ketb olundu. Tahrîren fî evâili şehri Zilhicceti’ş-şerîfe li sene 1023. Şuhûdü’l-hâl: Fahrü’l-cüyûş İbrahim Çavuş-ı dergâh-ı [âlî], Ali Efendi b. Yusuf, Hasan Çelebi b. Süleyman, Mustafa, Mehmed b. Ali, Ahmed Bey b. Durmuş ve gayruhüm.