Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 166 Hüküm no: 182 Orijinal metin no: [63b-2, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice bt. Mahmud’un, ölen kocasının terekesinden mehir alacağı olduğu Ahmed b. Ali el-İmâm ve Mehmed b. Hüdâverdi el-Müezzin nâm kimesneler meclis-i şer‘-i şerîf ve mahfil-i dîn-i münîfde hâzırân olup, mahmiye-i Galata müzâfâtından Kasımpaşa mahallâtından Surûrî mahallesinde bundan akdem vefât eden Mustafa Beşe nâm kimesnenin Fazlullah nâm sagīr oğluna kıbel-i şer‘den mansûb vasî olan Mehmed Beşe b. Abdullah nâm husûs-i âti’z-zikri münkir hasm-ı câhid mahzarında, merhûm-ı merkūmun zevcesi olan hâmiletü hâze’l-kitâb Hatice bt. Mahmud nâm hâtundan sâdır olan da‘vâ-yı sahîha-i şer‘iyyede gıbbe’l-istişhâdi’ş-şer‘î şöyle şehâdet ettiler ki, müteveffâ-yı mezbûr hâl-i hayâtında bizim yanımızda ve katımızda, üzerinde ve zimmetinde müdde‘iye-i mezbûrenin, nikâhında ta‘ahhüd ettiği mehr-i müeccelinden râyicü’l-vakt altı bin akçe-i Osmânî hakkı olduğunu ikrâr ve i‘tirâf etti. Müdde‘iye-i mezbûreye, meblağ-ı merkūmu müteveffâ-yı merkūmdan aslen veya vekâleten kısmen veya tamâmen almadığına, hibe etmediğine, bi vechin mine’l-vücûh zimmetini ibrâ etmediğine dâir yemîn billâhi’l-azîm verilmesinden sonra, şehâdetleri ba‘de’t-ta‘dîli’ş-şer‘î ve’t-tezkiyyeti’ş-şer‘iyye inde’ş-şer‘ makbûl ve mu‘teber olmağın hâkim şehâdetleri mûcebince meblağ-ı mezbûrun müteveffâ-yı merkūmun muhallefâtından edâsına hükm etti. Cerâ zâlike ve hurrire fî evâhiri Zilhicceti’ş-şerîfe sene selâse ve ışrîn ve elf. Şuhûdü’l-hâl: Ali Bey b. Mustafa el-Cündî, Mustafa Bey b. Abdullah, Hasan b. Hüdâverdi, Ahmed b. Hacı Ali, Mahmud Çelebi ve gayruhüm.