Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 172 Hüküm no: 191 Orijinal metin no: [66a-3, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe Hatun bt. Abdullah’ın Kenan b. Abdullah’ta mehr-i müeccelinden alacağı olduğu Udûlden Hüseyin Beşe b. Abdullah ve diğer Hüseyin b. İlyas nâm kimesneler meclis-i şer‘-i şerîfde hâzırân olup, hâl-i hayâtında mahmiye-i Galata tevâbi‘inden Fındıklı mahallesinde sâkin olup bundan akdem cezîre-i Kıbrıs’da vefât eden Kenan b. Abdullah er-Râcilin vasiyyetlerini tenfîze ve evlâd-ı sıgārının tesviye-i umûruna vasiyy-i muhtâr olan Ali Beşe b. Abdullah nâm husûs-i âti’z-zikri münkir olan hasm-ı câhid mahzarında, müteveffâ-yı mezkûrun zevce-i metrûkesi olan bâ‘isetü hâze’l-kitâb Âişe Hâtun bt. Abdullah’dan sâdır olan da‘vâ-yı sahîha-i şer‘iyyede gıbbe’l-istişhâdi’ş-şer‘î şöyle şehâdet ettiler ki, müdde‘iye-i mezbûrenin, müteveffâ-yı merkūmun zimmetinde nikâhında ta‘ahhüd ettiği mehr-i müeccelinden râyicü’l-vakt üç bin akçe hakkı vardır. Müdde‘iye-i mezbûreye, meblağ-ı merkūmu müteveffâ-yı merkūmdan aslen veya vekâleten kısmen veya tamâmen almadığına, hibe etmediğine, bi vechin mine’l-vücûh zimmetini ibrâ etmediğine dâir yemîn-i billâhi’l-azîm verilmesinden sonra, şehâdetleri ba‘de’t-ta‘dîli’ş-şer‘î ve’t-tezkiyyeti’ş-şer‘iyye inde’ş-şer‘ makbûl ve mu‘teber olmağın hâkim şehâdetleri mûcebince meblağ-ı mezbûrun müteveffâyı merkūmun muhallefâtından edâsına hükm etti. Cerâ zâlike ve hurrire fî evâhiri Zilhicce sene selâse ve ışrîn ve elf. Şuhûdü’l-hâl: El-Hâc Mehmed b. Cafer, el-Hâc Muharrem b. Habil, Mehmed Bey b. Receb, Hüseyin b. Abdullah.