Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 172 Hüküm no: 192 Orijinal metin no: [66b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yeniçeri Hüseyin Subaşı b. Abdullah’ın vefat eden Kenan Reis b. Abdullah’da alacağının olduğu Yeniçeri tâifesi çorbacılarından olup yirmi altıncı ağa bölüğünde çorbacı olan Hüseyin Subaşı b. Abdullah tarafından husûs-ı âti’z-zikre vekîl olup, hasm-ı şer‘-i câhid mahzarında Mustafa b. Cafer ve Ramazan b. Ali şehâdetleriyle vekâleti sâbite olan Ali Beşe b. Mustafa nâm odabaşı mahfil-i kazâda, mahmiye-i Galata hâricinde Tophâne mahallâtından Fındıklı mahallesi sâkinlerinden olup, bundan akdem fevt olan Kenan Reis b. Abdullah nâm râcilin evlâd-ı sıgārının tesviye-i umûruna vasiyy-i muhtâr Ali Beşe b. Abdullah nâm râcil mahzarında bi’l-vekâle takrîr-i da‘vâ edip, müteveffâ-yı mezbûr Kenan Reis zimmetinde müvekkilim mûmâ-ileyh Hüseyin Subaşı’nın karz-ı şer‘îden ve buğday bahâsından kırk bin dahi akçe hakkı vardır, suâl olunup alıverilmesini taleb ederim dedikde, gıbbe’s-suâl ve akībe’l-inkâr, müdde‘î-i mezbûrdan cevâbına muvâfık beyyine taleb olundukda, udûlden Hüseyin Beşe b. İlyas ve Kasım Beşe b. Abdullah li ecli’ş-şehâde meclis-i şer‘a hâzırân olup, fi’l-hakīka müteveffâ-yı mezbûr Kenan Reis zimmetinde mezbûr Ali Beşe’nin müvekkili merkūm Hüseyin Subaşı’nın karzdan ve buğday bahâsından kırk bin akçe hakkı vardır, bu husûsa şâhidleriz, şehâdet dahi ederiz deyû edâ-i şehâdet-i şer‘iyye eylediklerinde, ba‘de’t-ta‘dîl ve’t-tezkiyye şehâdetleri hayyiz-i kabûlde oldukdan sonra mûcebine hükm birle, mâ hüve’l-vâki‘ kayd olundu. Hurrire fî evâsıtı şehri Zilhicce li sene selâse ve ışrîn ve elf. Şuhûdü’l-hâl: Mehmed b. Ali, Hüseyin b. Mehmed, Piyâle Beşe b. Abdullah, Mustafa Beşe b. Mehmed ve gayruhüm.