Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 174 Hüküm no: 194 Orijinal metin no: [67b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Memi Paşa b. Abdülmennân’ın terekesinden Yani v. Matyoroz ve Panayot v. Dimo ile ortakları Yorgi v. Aleksandra’nın alacaklarının ödendiği Rumeli’nde kazâ-i Trapoliçe nâm kasabada Yani v. Matyoroz ve Panayot v. Dimo nâm zimmîler mahfil-i kazâda, mahmiye-i Galata müzâfâtından kasaba-i Kasımpaşa sâkinlerinden olup bundan akdem Donanma-yı Hümâyûn seferinde Avarin nâm mevzi‘de şehâdet câmını nûş edip vâsıl-ı rahmet-i Rahmân olan Memi Paşa b. Abdülmennân nâm kimesnenin sulbî kebîr oğlu fahrü’l-a‘yân Ali Ağa nâm kimesneyi ihzâr ve üzerine da‘vâ edip, müteveffâ-yı müşârün-ileyh bundan akdem Mora sancağı beyi oldukda hâslarından kasaba-i mezbûre voyvodalığı Yorgi v. Aleksandra nâm zimmî ile üçümüz, dört senesi ber vech-i maktû‘ iki yüz kırk bin akçeye birbirimiz kefâletiyle der uhde edip, meblağ-ı mezbûrdan ber vech-i peşîn yüz bin akçesini hâl-i sıhhatinde paşa-yı mezbûr bizden alıp kabz edip, ba‘dehû zikr olunan voyvodalığı Hasan Ağa nâm kimesneye der uhde edip ona zabt ettirip, kat‘â bize dahl ettirmemekle, biz dahi peşîn verdiğimiz yüz bin akçeye mürâca‘at ettiğimizde altmış bin akçesini alıp kabz edip, mâ‘adâsı olan otuz beş bin akçeyi dahi müteveffâ-yı müşârün-ileyhin muhallefâtından taleb ederiz dediklerinde, gıbbe’s-suâl mûmâ-ileyh Ali Ağa cevâb verip, fi’l-vâki‘ hâl minvâl-i meşrûh üzre olup, lâkin meblağ-ı mezkûr yüz bin akçeden bâkī kalan otuz beş bin akçeyi nefs-i Anabolu’da mezbûrân zimmîlerin şerîki olan Yorgi v. Aleksandra nâm zimmîye babam merhûmun Piyâle oğlu Hüseyin Bey zimmetinde deyn-i şer‘îden olan otuz beş bin akçe hakkı ile şerâit-i havâle müctemi‘a olduğu hâlde havâle edip, mezbûr Yorgi dahi havâleyi kabûl etmekle, merhûm-ı mezbûrun zimmeti berî olmuşdur dedikde, gıbbe’l-inkâr ve akībe’l-istişhâdi’ş-şer‘î udûlden bi’l-fi‘l Anabolu kapudânı olan Hüseyin Çelebi b. İlyas Kethüdâ ve Mehmed Bey b. Sefer nâm kimesneler li ecli’ş-şehâde hâzırân olup, fi’l-hakīka mezbûrûn zimmîlerin paşa-yı müşârün-ileyhe ber vech-i peşîn verdikleri yüz bin akçenin otuz beş bin akçesini merkūmân zimmîlerin şerîki olan Yorgi v. Aleksandra’ya paşa-yı müşârün-ileyh kasaba-i Anabolu’dan Piyâle oğlu Hüseyin Bey’de deyn-i şer‘îden otuz beş bin akçe hakkı olan şerâit-i havâleye müctemi‘ olduğu hâlde havâle edip, mezbûr Yorgi dahi havâleyi kabûl eyledi. Bu husûsa biz şâhidleriz, şehâdet dahi ederiz dediklerinde, şehâdetleri hayyiz-i kabûlde vâkı‘a olup, mâ-vaka‘a kayd olundu. Tahrîren fî evâsıtı Zilka‘de li sene 1023. Şuhûdü’l-hâl: Ahmed Çavuş b. İlyas, Hacı Hasan b. Abdullah, Şaban Dede b. Abdullah, Mehmed b. Receb, Derviş b. Hızır, Hacı Mehmed b. Süleyman, Nebi b. ( ) Münâdî, Ali Çelebi b. Osman ve gayruhüm.