Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 176 Hüküm no: 196 Orijinal metin no: [68a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. Hasan’ın Rus asıllı câriyesi Mihriban’ı vasiyyet yoluyla azat etmiş olduğu İşbu hâmiletü’l-kitâb orta boylu açık kaşlı sarı benizli Rûsiyyetü’l-asl Mihriban mahfil-i kazâda, mahmiye-i Galata hısnı dâhilinde Bereketzâde mahallesi sâkinelerinden olup bundan akdem fevt olan Âişe bt. Hasan nâm hâtunun zevci olup, işbu hâzır fi’l-meclis olan Hasan Reis b. Abdullah nâm kimesneden gayrı zâhirde vâris-i ma‘rûfu olmamağın, mahmiye-i mezbûrede bi’l-fi‘l beytülmâl-i âmme emîni olan Mustafa Ağa tarafından vekîl olup, müteveffât-ı mezbûrenin muhallefâtının nısfına vaz‘-ı yed eden Yusuf Bey el-Cündî mahzarında takrîr-i da‘vâ edip, müteveffât-ı mezbûre seyyidem hâl-i hayâtında beni müdebber-i mukayyed ile tedbîr edip, hâlâ yedimde bin yirmi bir senesi Muharremü’l-harâmı’nın dokuzuncu günüyle müverreha ve mahmiye-i Galata mahkemesinde nâibü’ş-şer‘ olan Mevlânâ Ahmed Efendi b. Yusuf imzâsıyla mümzât ve hatmiyle mahtûm hüccet-i tedbîr dahi vardır deyû ba‘de’l-ibrâz [68b] mazmûn-ı hüccete nazar olundukda, fi’l-vâki‘ takrîr-i vâkı‘a muvâfık bulunup emîn-i mezbûr istintâk olundukda, mazmûn-ı hüccet[i] münkir olmağın, müdde‘iye-i mezbûreden mazmûn-ı hüccete beyyine taleb olundukda, zeyl-i hüccetde isimleri mastûr olan müslimînden Veli b. Abdullah ve Hüseyin b. Sefer ve Ahmed b. Ali ve el-Hâc Ahmed b. Abdullah nâm kimesneler meclis-i şer‘a li ecli’ş-şehâde hâzırûn olup, fi’l-vâki‘ müteveffât-ı mezbûre Âişe Hâtun câriye-i memlûkesi mezbûre Mihriban’ı müdebber ile tedbîr ve hüccet edip, hüccet-i mezbûre dahi târih-i mezbûrede mahmiye-i mezbûrda nâibü’ş-şer‘ olan Mevlânâ Ahmed Efendi b. Yusuf huzûrunda olmuşdur, hat ve hatm mevlânâ-yı mûmâ-ileyhindir, mazmûn-ı hüccete şâhidleriz, şehâdet dahi ederiz dediklerinde, şehâdet-i şer‘iyyeleri ba‘de’t-ta‘dîl ve’t-tezkiyye hayyiz-i kabûlde vâkı‘a olmağın, merkūme Mihriban’ın müdebber-i muhtâr üzre cümle malından ıtkına hükm olunup, mâ-vaka‘a gıbbe’t-taleb kayd olundu. Tahrîren fî evâhiri Zilhicceti’ş-şerîfe li sene selâse ve ışrîn ve elf. Şuhûdü’l-hâl: Sinan Efendi b. Mustafa, Ahmed Çelebi b. Ali, Hacı Yusuf b. Abdullah, Mustafa b. Şaban, Mustafa b. Mehmed Muhzır ve gayruhüm.