Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 184 Hüküm no: 204 Orijinal metin no: [71b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Bey b. Abdullah’ın terekesinden olan dükkânın borcuna karşılık Mustafa b. İskender’e satıldığı Mahmiye-i Galata tevâbi‘inden kasaba-i Beşiktaş mahallâtından merhûm Sinan Paşa mahallesi sâkinlerinden olup, bundan akdem fevt [olan] merhûm Mehmed Bey b. Abdullah nâm kimesnenin verâseti kebîr oğlu Ali Çelebi’ye ve sagīr oğlu Derviş’e ve kebîre kızı Fâtıma’ya münhasıra oldukdan sonra mezbûr Ali Çelebi asâleten ve sagīr-i mezbûrun tesviye-i umûruna vasiyy-i muhtâr olan Hüseyin Bey b. Behram vesâyeten ve mezbûr Fâtıma tarafından dahi husûs-ı âti’z-zikre vekîl olup, hasm-ı şer‘-i câhid mahzarında bimâ hüve nehcü’s-sübût şer‘an vekâleti sâbite olan Kurd b. Mustafa vekâleten mahfil-i kazâda, işbu sâhibü’l-kitâb Mustafa b. İskender mahzarında asâleten ve vekâleten ve vesâyeten ikrâr ve takrîr-i kelâm edip, müteveffâ-yı mezbûrun muhallefâtından mahmiye-i İstanbul’da merhûm Mahmud Paşa câmi‘i kurbunda vâki‘ yine iki tarafı merhûm-ı mezbûrun imâreti cidârına muttasıl ve bir cânibi merhûm Sinan Paşa vakfı ve bir tarafı Abdünnebi Çavuş dükkânı ve bir cânibi tarîk-i âm ile mahdûd olup, arsasının vakf-ı mezbûra senede yirmi akçe mukāta‘ası olan bennâ zirâ‘ıyla tûlen yirmi iki zirâ‘ ve Sinan Paşa vakfı’ndan cânibi başı bir buçuk zirâ‘ ve cidâr-ı mezbûra muttasıl olan başı yedi zirâ‘ ve arkası dört zirâ‘ cem‘an otuz dört buçuk zirâ‘ olan dükkân yeri, müteveffâ-yı mezbûrun zarûret-i deyni için ba‘de’l-arz ale’t-tâlibîn ve’r-râgıbîn mezbûr Mustafa Çelebi’ye mütevellî-i vakf-ı mezbûr ma‘rifetiyle [72a] devr [ve] tefvîz edip, mukābele-i tefvîzde yedinden iki bin nakid akçe alıp kabz eyledik. Ba‘de’l-yevm keyfe mâ yeşâ’ mutasarrıf olsun dediklerinde, mukırr-ı merkūmûnun asâleten ve vekâleten ve vesâyeten ikrârlarını el-mukarru lehü’l-mezbûr bi’l-muvâcehe kabûl edicek, mâ-vaka‘a ketb olundu. Tahrîren fî evâili Zilhicce li sene selâse ve ışrîn ve elf. Şuhûdü’l-hâl: Mustafa b. İbrahim, Mehmed b. Abdullah, Mehmed Çelebi b. İskender, Ahmed Efendi, Receb Efendi el-İmâm, Ahmed b. Bekir, Mehmed Çelebi b. Mustafa ve gayruhüm.