Galata Mahkemesi 46 Numaralı Sicil (H. 1024 - 1029 / M. 1615 - 1620) cilt: 38, sayfa: 31 Hüküm no: 1 Orijinal metin no: [2a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Çelebi b. Hüseyin’in İbrahim Bey’den alacaklı olduğu [Derkenâr:] Bu hüccet dahi Hanefi Efendi hazretleri imzâsı iledir. Mahmiye-i İstanbul’da hâlâ binâ olunan câmi‘-i şerîf-i sultânî -dâme medârü’l-emn ve’l-emânî- evkāfından olup vilâyet-i Rumeli’nde İzdin mukāta‘asına bi’l-fi‘l voyvoda olup hâlâ dârü’s-sa‘âde ağası olup evkāf-ı mezbûreye nâzır olan umdetü’l-havâs ve’l-mukarrebîn izzetlü el-Hâc Mustafa Ağa hazretleri tarafından husûs-ı âti’l-beyâna vekîli olduğu nehc-i şer‘î üzre sâbit olan işbu sâhibü’l-kitâb fahrü’l-akrân Hasan Çelebi b. Hüseyin nâm kimesne meclis-i şer‘-i kavîmde medîne-i Hazret-i Ebî Eyyûb-i Ensârî -radiye anhu Rabbühü’l-Bârî- sâkinlerinden olup bundan akdem mukāta‘a-i mezbûre voyvodası iken vefât eden İbrahim Bey’in sulbiye sagīre kızı Fâtıma’nın vasiyy-i şer‘îsi olduğu hasm-ı şer‘î-i câhid mahzarında nehc-i şer‘î üzre sâbit olan Mehmed Çelebi b. Hemdem muvâcehesinde üzerine da‘vâ edip merhûm İbrahim Bey’in voyvodalığı hâlinde mahsûl-i vakf-ı mezbûrdan iki yüz doksan bin yüz kırk akçe kabz edip kable’l-edâ merhûm olmağın hâlâ müteveffâ-yı mezbûrun muhallefâtına vâzı‘ü’l-yed olan vasiyy-i merkūmdan şer‘an alıverilmesi matlûbumdur dedikde gıbbe’s-suâl ve’l-inkâr mezbûr Hasan Çelebi’den beyyine taleb olundukda udûl-i müslimînden Mehmed Bey b. Ali ve Mehmed Çelebi b. Ali eş-şehîr bi Mevânî meclis-i şer‘a hâzırân olup gıbbe’l-istişhâd fi’l-vâki‘ merhûm-ı mezbûr zimmetinde vech-i meşrûh üzre iki yüz doksan bin yüz kırk üç akçe bâkīdir biz bu husûsa şâhidleriz şehâdet dahi ederiz dediklerinde ba‘de’t-ta‘dîl şehâdetleri makbûle olmağın mûcebi ile hüküm birle mâ hüve’l-vâki‘ isre’t-taleb sebt olundu. Fî gurreti Rebî‘ilâhir li sene sitte ve ışrîn ve elf. Şuhûdü’l-hâl: Ahmed Çelebi [b.] İbrahim, Abdi Çelebi b. Ömer, Şaban b. Dellâl, Ahmed Çelebi b. Sarrâc, Mustafa b. Mehmed el-Muhzır Mâ fîhi cerâ inde’l-fakīr Hanefi b. Sâlih el-Kassâmü’l-askerî bi medîneti Galata ve Havâss-ı Kostantıniyye el-mahmiyye.