Galata Mahkemesi 46 Numaralı Sicil (H. 1024 - 1029 / M. 1615 - 1620) cilt: 38, sayfa: 31 Hüküm no: 2 Orijinal metin no: [2a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim Bey’in satılan muhallefâtını Hasan Çelebi b. Hüseyin’in vekaleten kabz ettiği Bâtın-ı hüccetde mastûrü’l-ism olan Hasan Çelebi b. Hüseyin meclis-i şer‘a hâzır olup yine mastûrü’l-ism olan işbu bâ‘isü’l-hurûf Hâce Mehmed Efendi mahzarında takrîr-i kelâm edip müteveffâ-yı mezbûrun cümle muhallefâtını bi’l-fi‘l Yenişehir kadısı olan izzetlü Yahya Efendi hazretlerinin izin ve mâ‘rifetleriyle kabz edip mümzâ ve mahtûm defterleri ile getirip mezbûr Mehmed Efendi ma‘rifetiyle sûk-ı sultânîde bey‘ eylediğimizde cümle muhallefâtı ba‘de’l-harc ve’l-mesârif üç yüz on dokuz bin beş yüz yirmi beş akçe oldukdan sonra meblağ-ı mezbûrun iki yüz seksen bin yüz kırk üç akçesini ba‘de’s-sübûti’ş-şer‘î bâtın-ı hüccetde zikr olunan câmi‘-i cedîd-i sultânî için vekâleten kabz eylediğimden sonra otuz dokuz bin üç yüz seksen iki akçe merhûm-ı mezbûrun muhallefâtından vasiyy-i mezbûr Hoca Mehmed Efendi yedinde bâkī kalmışdır dedikde gıbbe’t-tasdîki’l-mu‘teber mâ hüve’l-vâki‘ sebt [olundu]. Fî evâhiri Rebî‘ilâhir li sene 1026. Şuhûdü’l-hâl: Abdi Çelebi b. Ömer, Hızır b. Mehmed, Hasan Ağa b. ( ), Ahmed Çelebi b. İbrahim, Ahmed Çelebi es-Sarrâcü’s-sultânî