Galata Mahkemesi 46 Numaralı Sicil (H. 1024 - 1029 / M. 1615 - 1620) cilt: 38, sayfa: 65 Hüküm no: 40 Orijinal metin no: [15b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Müteveffâ Sena Efendi b. Murad’ın hayatta iken kölesi Behruz b. Abdullah’ı azat ettiği İşbu sâhibü’l-kitâb orta boylu açık kaşlı kara gözlü başında eser-i cerhi var sarışın Nemçiyyü’l-asl Behruz b. Abdullah meclis-i şer‘-i şerîfde medîne-i Hazret-i Ebî Eyyûb’da Takkecibaşı mahallesinde sâkin iken Harem-i muhterem-i Mekkî’de vefât eden merhûm Senâ Efendi b. Murad’ın kebîr oğlu Mustafa Çelebi ve zevce-i metrûkesi olup sagīre kızı Âişe’nin vasiyy-i şer‘îsi fahrü’l-muhadderât Cemâne Hâtun bt. Mahmud tarafından vekâleti nehc-i şer‘î üzre sâbite olan Süleyman Çelebi b. Hüseyin üzerlerine da‘vâ edip ben merhûm-ı mezbûrun abd-i memlûkü olup lâkin hâl-i hayâtında ve kemâl-i sıhhatinde hacca gider oldukda beni i‘tâk-ı sahîh-i şer‘î ile i‘tâk edip hâlâ mu‘tak iken verese-i mezbûrîn rık olmak zu‘mu ile bana vaz‘-ı yed ederler, yedleri kasr olunmak matlûbumdur deyip gıbbe’s-suâl ve akībe’l-inkâr ve’l-istişhâd udûl-i müslimînden Mehmed Efendi b. Hemdem ve es-Seyyid Hüseyin b. es-Seyyid Mehmed meclis-i şer‘-i şerîfe hâzırân olup fi’l-hakīka merhûm-ı mezbûr hacca gider oldukda memlûkü müdde‘î-i mezbûr Behruz’u bizim huzûrumuzda i‘tâk-ı sahîh-i şer‘î ile i‘tâk eyledi, hâlâ mezbûr Behruz sâir ahrâr gibi hürdür, bu husûsa şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde gıbbe’t-ta‘dîl şehâdetleri hayyiz-i kabûlde vâki‘ olmağın mûceb-i şehâdetleriyle müdde‘î-i mezbûr Behruz’un ıtkına hükm olundu. Fi’t-târihi’l-mezbûr Şuhûdü’l-hâl: Es-Sâbikūn