Galata Mahkemesi 46 Numaralı Sicil (H. 1024 - 1029 / M. 1615 - 1620) cilt: 38, sayfa: 65 Hüküm no: 41 Orijinal metin no: [15b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sena Efendi b. Murad’ın mülk bahçesini kızı Fâtıma’ya on yıl önce hibe ettiği Medîne-i Hazret-i Ebî Eyyûb-i Ensârî’de Takkecibaşı mahallesi sâkinlerinden iken Harem-i muhterem-i Mekkî’de vefât eden merhûm Senâ Efendi b. Murad’ın sulbiye-i kebîre kızı fahrü’l-muhadderât Fâtıma Hâtun tarafından husûs-ı âtîde vekâleti nehc-i şer‘î üzre sâbite olan zevci fahrü’l-emâcid ve’l-ekârim Hüseyin Efendi b. Mustafa meclis-i şer‘-i şerîf-i şâmihü’l-imâdda merhûm-ı mezbûrun sulbî kebîr oğlu olup hadîka-i âtiyyeye merhûm-ı mezbûrun muhallefâtından olmak zu‘mu ile vaz‘-ı yedi şer‘an sâbit olan Mustafa Çelebi mahzarında üzerine da‘vâ edip müteveffâ-yı mezbûrun mahalle-i mezbûrede vâki‘ menziline muttasıl ve tarafeynden Ramazan Çelebi ve Pîrî mülkleri ile ve bir tarafı tarîk-i âm ile mahdûd bi’r-i mâ ve eşcâr-ı müsmire ve gayr-ı müsmireyi hâvî silk-i mülkünde muntazam bir kıt‘a hadîkayı merhûm-ı mezbûr hâl-i hayâtında ve kemâl-i sıhhatinde târih-i kitâbdan üç sene mukaddem kızı müvekkile-i mezbûre Fâtıma’ya hibe ve temlîk edip müvekkilem dahi ittihâb ve kabz edip hattâ vech-i meşrûh üzre müslimîn mahzarlarında ikrâr dahi etmişdir, hâlâ mezbûr Mustafa Çelebi hadîka-i mezbûreye bi gayrı vech-i şer‘î [16a] vaz‘-ı yed eder kasr-ı yed ile emr olunmak matlûbumdur deyip gıbbe’s-suâl ve akībe’l-inkâr ve’l-istişhâd udûl-i müslimînden Süleyman Çelebi b. Hüseyin ve es-Seyyid Hüseyin b. es-Seyyid Mehmed meclis-i şer‘-i şerîfe li ecli’ş-şehâde hâzırân olup fi’l-hakīka merhûm-ı mezbûr hâl-i hayâtında ve kemâl-i sıhhatinde târih-i kitâbdan üç sene mukaddem hadîka-i mezbûreyi kızı müvekkil-i mezbûre Fâtıma’ya hibe ve temlîk ettiğine ikrâr ve bizi husûs-ı mezbûra işhâd eylemişdir husûs-ı mezbûra şâhidleriz şehâdet dahi ederiz deyû ikrâr-ı şehâdet-i şer‘iyye eylediklerinde gıbbe’t-ta‘dîl şehâdetleri hayyiz-i kabûlde vâki‘ olmağın mezbûr Mustafa Çelebi mu‘ârazadan men‘ olundu. Fi’t-târihi’l-mezbûr li sene semânin ve ışrîn ve elf Şuhûdü’l-hâl: Es-Sâbikūn