Galata Mahkemesi 46 Numaralı Sicil (H. 1024 - 1029 / M. 1615 - 1620) cilt: 38, sayfa: 71 Hüküm no: 46 Orijinal metin no: [18b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim Reis b. Mehmed’in hayatta iken Eflak asıllı kölesi Rıdvan b. Abdullah’ı azat ettiği İşbu sâhibü’l-kitâb orta boylu gök gözlü sarışın çenesinin sağ tarafında ve başında yara alâmeti var Eflakiyyü’l-asl Rıdvan b. Abdullah mahfil-i şer‘-i şerîfde mahmiye-i Galata tevâbi‘inden kasaba-i Kasımpaşa’da el-Hâc Hasan mahallesinde vefât eden merkūm İbrahim Reis b. Mehmed’in sulbî sagīr oğlu Mehmed’in vasiyy-i muhtârı olan el-Hâc Mustafa b. Mehmed ve bint-i sulbiyesi Sâime nâm hâtun muvâcehesinde üzerine takrîr-i da‘vâ edip ben merhûm-ı mezbûr İbrahim Reis’in abd-i memlûkü olup lâkin hâl-i hayâtında ve kemâl-i akl-i sıhhatinde beni müdebber edip vefât etmekle mu‘tak olmuşken vasiyy-i mezbûr ile mersûm Sâime Hâtun rıkkı olmak zu‘mu ile bana vaz‘-ı yed ederler yedleri kasr olunmak matlûbumdur dedikde gıbbe’s-suâl ve akībe’l-inkâr ve’l-istişhâd udûl-i müslimînden el-Hâc İbrahim b. Mehmed ve Ahmed Çelebi b. Mustafa nâm kimesne li ecli’ş-şehâde mahfil-i şer‘-i şerîfe hâzırân olup gıbbe’l-istişhâd edâ-i şehâdet-i [19a] şer‘iyye edip fi’l-vâki‘ merhûm-ı mezbûr İbrahim Reis evsâf-ı mezkûre ile ittisâfı olan mezbûr Rıdvan’ı hâl-i hayâtında ve kemâl-i aklında müdebber eyledi, biz bu husûsa şâhidleriz şehâdet dahi ederiz dediklerinde ba‘de’t-ta‘dîl şehâdetleri makbûle olmağın ve merhûm-ı mezbûrun sülüs mâlı dahi müsâ‘id olmağın mezbûr Rıdvan’ın ıtkına hüküm birle mâ hüve’l-vâki‘ bi’t-taleb sebt olundu. Hurrire fî evâsıtı Rebî‘ilevvel li sene sitte ve ışrîn ve elf Şuhûdü’l-hâl: El-Hâc Mehmed b. Cafer el-Müezzin, Abdülkerim b. Ahmed, Mehmed Çelebi b. Hüseyin, Ahmed Çelebi b. Mustafa, el-Hâc Mehmed b. ( ) et-Tabbâh, Mustafa b. Mehmed el-Muhzır, İbrahim el-Muhzır