Galata Mahkemesi 46 Numaralı Sicil (H. 1024 - 1029 / M. 1615 - 1620) cilt: 38, sayfa: 75 Hüküm no: 50 Orijinal metin no: [21a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Abdullah’ın muhallefâtının yarısının beytülmâle ait olduğu ve beytülmâl emîni Murad Ağa b. Abdülkerim tarafından Süleyman Reis’den tahsil edildiği Mahmiye-i Galata ve tevâbi‘inde bi’l-fi‘l beytülmâl emîni olan fahrü’l-a‘yân Murad Ağa b. Abdülkerim tarafından mahmiye-i mersûmede ve tevâbi‘inde vâki‘ olan beytülmâli ahz u kabza vekîli olduğu hasm-ı şer‘î-i câhid muvâcehesinde vech-i şer‘î üzre vekâleti sâbite olan Hüseyin Bey b. Mustafa mahfil-i şer‘-i şerîfde işbu râfi‘ü’l-kitâb Süleyman Reis b. Abdülvehhâb muvâcehesinde ikrâr ve takrîr-i kelâm edip mahmiye-i mersûme hâricinde Çatma Mescid mahallesinde sâkine iken vefât eden Fâtıma bt. Abdullah nâm hâtunun zâhirde zevci mezbûr Süleyman Reis’den gayrı vâris-i ma‘rûfu olma[ma]ğın muhallefâtının nısfı mezbûr Süleyman Reis’e ve nısfı dahi cânib-i beytülmâle âid olmuşdu el-hâletü hâzihî müteveffât-ı merkūme Fâtıma’nın cümle muhallefâtı mehr-i müeccel-i müsbeti ile dokuz bin akçe olmağın meblağ-ı mezbûr dokuz bin akçeden cânib-i beytülmâle âid olan dört bin beş yüz akçeyi mezbûrun yedinden vekâletim hasebiyle alıp kabz eyledim, ba‘de’l-yevm müteveffât-ı merkūmenin muhallefâtına müte‘allik mezbûr Süleyman Reis ile kat‘an da‘vâ ve nizâ‘ım yokdur eğer da‘vâ dahi edersem lede’l-hükkâmi’l-kirâm makbûle olmasın dedikde mukırr-ı mezbûr Hüseyin Bey’in bi’l-vekâle vech-i muharrer üzre cârî olan ikrârını merkūm Süleyman Reis dahi bi’l-muvâcehe tasdîk etmeğin mâ hüve’l-vâki‘ bi’t-taleb sebt ve terkīm olundu. Hurrire fi’l-yevmi’r-râbi‘ aşar min Rebî‘ilâhir li sene sitte ve ışrîn ve elf Şuhûdü’l-hâl: Abdullah Efendi b. Ömer el-İmâm, el-Hâc Şaban Reis b. İbrahim, Feridun b. Abdullah, Mehmed b. Mustafa